Қызылорда облысы Полиция департаментінің Шиелі аудандық полиция бөлімінің тергеушісі кәсіби әрі жүйелі жүргізілген тергеу нәтижесінде бір жылдан астам уақыт бойы ашылмай келген аса ауыр қылмысты ашты.
2024 жылғы ақпан айында Шиелі кентіндегі тұрғын үйлердің бірінде өрт шығып, оқиға орнынан әйел адамның мәйіті табылған. Алғашқы тексеру барысында өрттің абайсызда шығуы мүмкін деген болжам жасалған. Алайда сот-медициналық сараптама марқұмның өртке дейін қайтыс болғанын көрсеткенімен, нақты өлім себебін анықтау мүмкін болмады.
Аталған дерек бойынша қылмыстық іс тіркеліп, ұзақ уақыт бойы жедел-тергеу шаралары жүргізілді. 2025 жылғы мамыр айында Шиелі кентінде тұрғын үйге заңсыз кіру арқылы жасалған қарақшылық шабуыл дерегі тіркеліп, бұл іс Шиелі аудандық полиция бөлімінің тергеушісі полиция капитаны Жеңсікбаев Шындәулет Оразбекұлына тапсырылды.
Тергеу барысында ұсталған күдіктінің бұған дейін де жалғызбасты әйелдерге қатысты тонау, зорлау секілді ауыр қылмыстар жасағаны анықталды. Жиналған деректер мен дәлелдемелер бұрынғы өрт фактісімен өзара байланысты екенін көрсетті.
Тергеу барысында такси қызметін пайдаланғаны, куәгерлердің жауаптары мен жасырын тергеу әрекеттерінің нәтижелері оның кінәсін толық дәлелдеді.
Жиналған бұлтартпас дәлелдерден кейін күдікті марқұмның үйіне заңсыз кіріп, күш қолданып, алтын бұйымдарын алып кеткенін және қылмыстың ізін жасыру мақсатында үйді өртегенін мойындады. 2025 жылы сот үкімімен күдікті 25 жылға бас бостандығынан айырылды.
Елді алаңдатқан бұл істің ашылуы полиция қызметкерлерінің кәсібилігі мен табандылығының нәтижесі.
Марқұмның қызы қылмыстың ақ-қарасын ажыратып, кінәліні анықтап, қоғам тыныштығын күзету жолында қызмет еткен тергеушінің ерен еңбегі үшін алғыс білдірді.
«Істі тергеген полиция майоры Жеңсікбаев Шындәулет Оразбекұлының ұзақ уақытқа созылған күрделі тергеу ісіндегі тегеурінді еңбегі оң бағаға әбден лайық. Әділеттің салмағы сыналар сәтте заң мен ардың таразысын тең ұстап, қылмыстық істі жан – жақты әрі мұқият тергей білді.
Бұғып қалу мен бүгіп қалуды білмейтін батылдығы қылмыскерді анықтауда септігін тигізгені сөзсіз. Сауатты әрі нәтижелі жүргізілген тергеу жұмысының қорытындысында қылмыскер заң талаптарына сай жауапқа тартылып, әділ жазасын алды. Ақ пен қараның аражігін зерделеп, ақиқатты ашуда көрсеткен кәсіби шеберлігі үшін алғысымды білдіремін!» делінген Қызылорда облысы Полиция департаментінің бастығы полиция полковнигі С.Ергешовтің атына жолданған алғыс хатта.
Тергеушінің негізгі қағидаты – азаматтардың құқықтары мен бостандықтарын сақтау. Әр қылмыстық істің артындағы адам тағдырына деген жауапкершілік үшін ақиқаттың ақ жолынан ауытқымай, қызмет атқару кез — келген адамның қолынан келе бермейтіні шындық.
Жеңсікбаев Шындәулет Оразбекұлы 1990 жылы қыркүйек айының 4 күні Қызылорда облысының Шиелі ауданы Ақмая ауылында дүниеге келген.
«Менің полиция қызметкері боламын деген арманым мектеп кезінде басталған, ол үшін әскерге бару міндетті дегенді естіп әскерге баруға дайындалып жүргенімде 2009 жылы әкем Жеңсікбаев Оразбек Яхулаұлы өмірден өтті.
Содан анамның рұқсатын алып, әскерге кетіп, Шығыс Қазақстан облысы, Өскемен қаласындағы №5518 әскери бөлімінде Отан алдындағы борышымды өтеп келдім.
2011 жылы ҚР ІІМ-нің М.Бөгенбаев атындағы Ақтөбе заң институтына оқуға түстім. Оқуды бітірген соң Қызылорда облысы Полиция департаменті бастығының бұйрығымен Шиелі аудандық полиция бөлімінің жедел уәкілі лауазымына тағайындалып, еңбек жолым басталды. Қиындығы мен қызығы қатар жүретін бұл жол маған төзімділік пен табандылықты үйретті» дейді тегеуріні мықты тергеуші.
Бүгінде өз қызметіне адалдықты әркез бірінші орынға қоятын Шындәулет аяулы жары Маржан екеуі үш бала тәрбиелеуде.
Осы қызметке келген күннен бастап тыңғылықты жұмысы мен кәсіби шеберлігінің арқасында ұжым арасында абыройлы, қызметтік борышын адал атқарып келеді.