Есігімізден еніп, төрімізден орын алатын Жаңа жыл барша адамдар үшін ортақ мереке, әсіресе, оның балалар өмірінде алар орны айрықша. Бүгін Жаңақорған кентіндегі №293 Келешек мектебінде аудан әкімінің бүлдіршіндерге арналған жаңа жылдық шыршасы өтті.

Оған ауданның талантты да дарынды оқушылардан барлығы 100 ге жуық бала қатысты. Олардың қатарында оқу үздіктері, конкурстар мен түрлі байқаулардың жеңімпаздары және ерекше күтімді қажет ететін балалар бар.
Жаңа жылдық шырша мерекесі жас өнерпаздар дайындаған қойылыммен басталды. Одан соң аудан әкімі Мажит Самитов балалармен бірге жаңажылдық шырша шамын жағып, мерекемен құттықтады.

— «Құрметті, балалар! Сіздерді келе жатқан жаңа жылдарыңызбен құттықтаймын! Бұл мерекені баршаңыз асыға күтетіндеріңіз белгілі. Осының бәрі сіздер үшін. Бүгінгі қуанышты сәт естеріңізде ұзақ сақталып, алдағы жаңа жылды көтеріңкі көңіл күймен қарсы алуға септігін тигізеді деп сенемін.» , – деп мерекелік лебізін білдіріп, балаларға сыйлықтар табыстады.

Әкім шыршасында Аяз ата мен Ақшақар және түрлі ертегі кейіпкерлері жиналған көпшілікке қуаныш сыйлап, мерекелік кеш думанға ұласты. Балғын балақайлар өз өнерлерін көрсетіп, Аяз атаның сыйлығына кенелді.