Елді мекендердің жоғын бүтіндеп, кемшін тұсын жөндеп жүрген «Ауыл – ел бесігі» жобасы аясында өңірде ауқымды шаруалар атқарылуда. Бір ауылдың жолы жөнделсе, екіншісінің электр энергиясы қалыпқа келіп жатыр. Жеті жылдан бері жүзеге асып келе жатқан бағдарламаның тиімді тұсы көп.

Ауылдық елді мекендердің әлеуметтік, инженерлік және көлік инфрақұрылын дамыту, ауыл тұрғындарының әлеуметтік, тұрмыстық әл ауқатын жақсарту мақсатында бастау алған жоба аясында 7 жыл ішінде облыстың 79 ауылдық елді мекенінде құны 58,3 млрд теңгеден асатын 515 жоба жүзеге асырылды.

– Атап айтсақ, 2 мектептің жапсаржай құрылысы, 7 ауылдық клуб, 14 спорт кешені, 3 ауылдық дәрігерлік амбулатория құрылысы салынды. Сондай-ақ, 15 білім нысаны, 5 ауылдық клуб, 10 дәрігерлік амбулатория және 5 спорт нысаны күрделі жөндеуден өткізілді.

Осы бағытта, 11 ауылдық елді мекеннің электрмен қамту жүйесі, 5 ауылдық елді мекеннің ауыз сумен қамту жүйесі қайта жаңыртылып, 7 ауылдық елді мекен газдандырылды. Мұнан басқа 42 көше жарықтандырылса, 1 ауылдық елді мекенде абаттандыру жүргізіліп, 26 әлеуметтік нысанның жылу қазандығы жаңартылды, – дейді облыстық экономика және қаржы басқармасының, ауылдық аумақтарды және агроөнеркәсіп кешенін дамыту бөлімінің басшысы Бахытжан Қожабекұлы.

Сондай-ақ, көлік инфрақұрылымын жақсарту мақсатында 64 ауылдық елді мекеннің көшелерін жаңғырту, күрделі жөндеу бойынша 352 жоба, 7 ауылдық елді мекеннің жаяу жүргіншілер жолын салу бойынша 9 жоба жүзеге асырылды.

Биылға өтпелі кезеңмен жүзеге асырылатын 4 ауылдық елді мекеннің көшелерін күрделі жөндеу, 10 ауылдық елді мекеннің электрмен қамту жүйесін қайта жаңғырту, 2 ауылдық клубтың, 4 спорт кешеннің құрылысы салынуда.

«Qyrdan»-ақпарат