Жазғы демалыс – балалар үшін ерекше қуанышқа, қызықты оқиғалар мен жарқын сәттерге толы кезең. Оқу жылы аяқталғаннан кейін балалар таза ауада көбірек уақыт өткізіп, аулада ойнап, достарымен серуендеп, велосипед, самокат және ролик тебуге әуестенеді. Дәл осы уақытта олардың қауіпсіздігіне ерекше көңіл бөлу аса маңызды.
Балалардың қауіпсіздігін қамтамасыз ету – тек ата-аналардың ғана емес, қоғамның ортақ міндеті. Бұл бағытта блогерлер мен белсенді жастардың да рөлі ерекше. Әлеуметтік желілер арқылы олар жас буынды қоғамдық тәртіпті сақтауға, заң талаптарын орындауға және қауіпсіздік мәдениетін қалыптастыруға шақырады.
«Заң мен тәртіп» идеологиясын ілгерілету мақсатында Қызылорда облысы Полиция департаментінің қызметкерлері өңірге танымал блогер Ерсұлтан Байжановпен бірлесіп, ата-аналар мен балаларға жазғы демалыс кезіндегі қауіпсіздік шаралары туралы түсіндіру жұмыстарын жүргізіп, арнайы бейнетүсірілім ұйымдастырды.
Жаз мезгілі – балалар үшін демалыс пен қызықты оқиғаларға толы кезең. Алайда бұл уақытта қауіпсіздік мәселесіне ерекше назар аудару қажет. Балалардың көшеде, су айдындарында, ойын алаңдарында және қоғамдық орындарда өзін дұрыс ұстауы олардың өмірі мен денсаулығын сақтаудың басты кепілі болып табылады.
Іс-шара барысында полиция қызметкерлері блогермен бірлесіп, ата-аналарға балаларды қараусыз қалдырмау, олардың қайда және кіммен жүргенін бақылап отыру қажеттігін түсіндірді. Сондай-ақ балаларға жол қозғалысы ережелерін сақтау, рұқсат етілмеген орындарда суға түспеу және төтенше жағдай туындаған кезде жедел қызметтердің көмегіне жүгіну жолдары айтылды.
Арнайы түсірілген бейнероликтің басты мақсаты – жазғы демалыс кезінде орын алуы мүмкін қауіптердің алдын алып, балалар мен ата-аналардың қауіпсіздікке деген жауапкершілігін арттыру. Ақпараттық-түсіндіру жұмыстары тұрғындарды сақтыққа шақырып, құқықтық мәдениетті нығайтуға бағытталды.
Баланың өмірі мен қауіпсіздігі – ең басты құндылық. Бір сәттік салғырттық орны толмас өкінішке әкелуі мүмкін. Сондықтан әрбір ата-ана баласының қауіпсіздігіне бейжай қарамай, қажетті сақтық шараларын сақтауы қажет. Қарапайым қауіпсіздік ережелерін сақтау арқылы жазатайым оқиғалардың алдын алып, балалардың жазғы демалысын қауіпсіз әрі көңілді өткізуіне жағдай жасай аламыз.
Балалардың қауіпсіздігі – баршамыздың ортақ міндетіміз!
Қызылорда облысы Полиция департаменті ата-аналарды балалар қауіпсіздігіне бейжай қарамауға шақырады.