Сырдария ауданында кәмелетке толмаған жасөспірімдер арасындағы құқықбұзушылықтың алдын алу, олардың құқықтық сауаттылығын арттыру және заң талаптарын сақтау мәдениетін қалыптастыру мақсатында түсіндіру және профилактикалық іс-шара ұйымдастырылды.
Аталған іс-шараға Сырдария АПП бастығының орынбасары, полиция подполковнигі Дәулет Байменов, Сырдария аудандық полиция бөлімшесінің криминалдық полиция бөлімшесінің бастығы, полиция майоры Дулат Алиев, мектеп директорының тәрбие ісі жөніндегі орынбасары Ғазиз Қырданов, сондай-ақ сынып жетекшілер қатысты.
Іс-шара барысында құқық қорғау органдары қызметкерлері кәмелетке толмағандар арасында жиі кездесетін құқықбұзушылық түрлеріне (ұсақ бұзақылық, мектеп тәртібін бұзу, қоғамдық орындардағы тәртіпсіздік, зиянды әдеттерге әуестену және басқа да заңға қайшы әрекеттер) тоқталып, олардың туындау себептері мен салдарын жан-жақты түсіндірді. Сонымен қатар, құқықбұзушылықтың алдын алуда отбасының, мектептің және қоғамның бірлескен рөлі ерекше маңызды екені атап өтілді.
Кездесу барысында жасөспірімдердің бос уақытын тиімді ұйымдастыру, олардың түрлі үйірмелер мен спорттық секцияларға қатысуын арттыру, сондай-ақ әлеуметтік желілерді дұрыс пайдалану мәдениетін қалыптастыру мәселелері қозғалды. Оқушыларға заң талаптарын сақтау, өз құқықтары мен міндеттерін білу, құқықтық жауапкершілікті сезіну қажеттілігі түсіндірілді.
Полиция қызметкерлері өз сөздерінде түнгі уақытта заңды өкілінсіз көшеде жүрудің жауапкершілігі, бөтен мүлікке қол сұқпау, қоғамдық орындардағы тәртіп ережелерін сақтау, сондай-ақ буллинг пен кибербуллингтің алдын алу туралы нақты мысалдар келтіре отырып, түсіндірме жұмыстарын жүргізді.
Сонымен қатар, мектеп әкімшілігі тарапынан оқушылардың тәртібін бақылау, ата-аналармен тығыз байланыс орнату, тәрбиелік іс-шараларды жүйелі түрде өткізу қажеттілігі айтылды. Сынып жетекшілерге әрбір оқушымен жеке жұмыс жүргізу, олардың мінез-құлқындағы өзгерістерді дер кезінде анықтау және алдын алу шараларын күшейту ұсынылды.
Іс-шара барысында оқушылар тарапынан қойылған сұрақтарға толыққанды жауаптар беріліп, құқықтық мәдениетті қалыптастырудың маңыздылығы кеңінен түсіндірілді.
Жиын қорытындысында кәмелетке толмағандар арасындағы құқықбұзушылықтың алдын алу – тек құқық қорғау органдарының ғана емес, бүкіл қоғамның, ата-аналар мен білім беру ұйымдарының ортақ міндеті екендігі атап өтілді. Алдағы уақытта да осы бағыттағы жұмыстарды жүйелі түрде жалғастыру қажеттігі айтылды.