«Көктемнің бір күні – жылға азық» деген шаруалар үшін күздің де әр күні қымбат. Ала жаздайғы төгілген маңдай тердің жемісін көру үшін олар күзде уақытпен санаспай еңбектенеді. Сырдария ауданы егін жинау науқанын бастап кетті. Қазір ауданда 900-ге жуық ауыл шаруашылығы техникасы егістікте жүруде. Бүгін аудан әкімі Берік Сәрменбаев бұл мәселеге сергек қарауымыз керек екенін жеткізді.
– Биылғы вегетациялық кезең өте қиын жағдайда өтті. Мемлекет басшысы Қасым-Жомарт Кемелұлы Тоқаевтың, Үкіметтің, аймақ басшысы Нұрлыбек Машбекұлы Нәлібаевтың қолдауымен егінге қажетті су жеткізіліп, жинап алу кезеңіне жетіп отырмыз. Ауданда биыл 33 145 гектарға ауыл шаруашылығы дақылдары орналастырылды, оның ішінде, күріш дақылы 19 950 гектарға егілді. Бүгін 19 950 гектар күріш егіс алқабының суы толығымен байланып, егін жинау науқаны басталды, – деді Берік Сәрменбаев.
Жиында аудан басшысы Шаған ауылының жаңадан сайланған әкімі Қанат Несіпбаевты таныстырып, оған сәттілік тіледі. Мәжілісте сондай-ақ, Ұлттық ауыл шаруашылығы санағын жүргізу, жылу маусымына дайындық мәселелеріне қатысты нақты тапсырмалар берілді.
«QYRDAN-ақпарат»