Батырлық рух пен елдік мұраттың ұлы бұлқынысына айналған аталған алаң 1975 жылдың ақпан айында Ұлы Жеңістің 30 жылдығына арналып салынған. Бұл ескерткіш белгі арқылы ел басына күн туған шақта отанды қорғауға өлшеусіз үлес қосқан қызылордалықтардың қаһармандығы мен жанқиярлық ерлігі жадымызда жаңғырып тұрады.
Тарих таңбалағандай, екінші дүниежүзілік соғысқа Қызылорда өңірінен 150 мың адам аттанса, олардың 60 мыңы ғана елге оралды. Қаншама боздақтың асыл арманы, отаншыл сезімі, қайсарлық қасиеті ұрпақтан-ұрпаққа ұмытылмас мұра болып келеді.
Майдангерлеріміздің ерлігін ұлықтау және дәріптеу жолында түрлі патриоттық шаралар ұйымдастырылады. Биыл Ұлы Жеңістің 80 жылдығы мерекесіне орай Тағзым алаңында майдан даласында қаза тапқан боздақтарды еске алып, Отан үшін от кешкен батыр бабаларымыздың рухына тағзым жасалды.
Осы мемориал кешен қызылордалық 22 Кеңес одағының батырына арналған ескерткіш тақтамен толықтырылған. Мұнымен қатар, 1986 жылғы Желтоқсан оқиғасы, 1992-2001 жылдардағы ҚАЗБАТ Тәжікстан-Ауғанстан шекарасы, 1979-1989 жылдардағы Ауғанстан соғысы, 1949-1989 жылдардағы Семей атом полигоны, 1986 жылғы Чернобыль АЭС апаты құрбандарына арналып қойылған ескерткіштер бар. Жас ұрпақ ерліктің ерен үлгісін көрсеткен жерлестеріне гүл шоқтарын қойып, әрдайым құрмет көрсетеді.
«Тағзым алаңы» атты Даңқ мемориалы «Қазақстанның киелі жерлері географиясы» жобасы аясында «Өңірлік қасиетті нысандар» тізіміне енгізілген. 2018 жылы Қызылорда облысы бойынша тарих және мәдениет ескерткіштерінің 3D форматтағы интерактивті картасына енгізілген. QR-код тақтайшасы орнатылған.
Фото: қала әкімдігі