Қоғам тыныштығы мен азаматтардың қауіпсіздігін қамтамасыз ету – үлкен жауапкершілікті талап ететін маңызды міндет. Тәулік бойы тынымсыз еңбек етіп, қоғамдық тәртіпті сақтауға, құқық бұзушылықтың алдын алуға және қылмыспен күресуге атсалысып жүрген полиция қызметкерлері жыл сайын кәсіби мерекелерін ерекше атап өтеді. Биылғы Полиция күні Қызылорда облысында кең көлемде ұйымдастырылып, сала қызметкерлерінің еңбегі мен ерлігіне құрмет көрсетілген тағылымды шараға ұласты.

Мерекелік жиын Сырдың төріндегі Өнер орталығында өтті. Салтанатты шараға облыс басшылығы, құқық қорғау органдарының ардагерлері, қоғам қайраткерлері мен бұқаралық ақпарат құралдарының өкілдері қатысты.

Кең де көрікті мәдениет сарайында мыңға жуық тәртіп сақшылары жиналды. Салтанатты шараға облыс әкімі Ергешбаев Мұрат Нәлхожаұлы арнайы қатысып, полиция қызметкерлерін кәсіби мерекелерімен құттықтады.

Салтанатты шарада сөз алған аймақ басшысы полиция қызметінің қоғамдағы рөліне тоқталып, полицейлердің еселі еңбегін атап өтті. Өңір басшысы бірқатар полиция қызметкеріне қызметтік міндеттерін үлгілі орындағаны үшін марапаттарын табыстады.

Қызығынан гөрі қиындығы басым мамандықты таңдап, батылдылық пен табындылықты бойына сіңірген, адалдық пен әділеттілікті ту етіп ұстаған тәртіп сақшыларының кәсіби мерекесіне орай ұйымдастырылған шара барысында Қазақстан Республикасы Ішкі істер министрі полиция генерал – лейтенанты Саденов Ержан Сапарбекұлының мерекелік құттықтау хаты оқылды.

Мерекелік шараның маңызды бөлігінің бірі – үздік қызметкерлерді марапаттау рәсімі болды. Қызметтік міндеттерін адал атқарып, жоғары кәсіби біліктілігімен ерекшеленген бірқатар полиция қызметкерлеріне алғыс хаттар мен арнайы марапаттар табысталды. Сонымен қатар ішкі істер органдарында ұзақ жылдар бойы жемісті еңбек еткен ардагерлерге де құрмет көрсетіліп, олардың жас буынға үлгі боларлық еңбектері ерекше аталып өтті.

Полиция қызметі тек қылмыспен күресумен шектелмейді. Бүгінде тәртіп сақшылары қоғаммен тығыз байланыс орнатып, халықтың сенімін арттыру бағытында да жүйелі жұмыстар атқаруда. Азаматтардың өтініштері мен ұсыныстарына жедел ден қою, ашықтық пен қолжетімділікті қамтамасыз ету – қазіргі полиция қызметінің басты қағидаттарының біріне айналған. Осы бағыттағы жұмыстар мерекелік жиында да кеңінен сөз болды.

Сонымен қатар Департамент бастығы өмірдің талай белестерінен табысты өтіп, бүгінде алып бәйтеректей бір әулеттің ақылшы тірегі, ұжымның арқа сүйер ардагерлерін марапаттады. Өз кезегінде Полиция департаментінің Ардагерлер Кеңесінің төрағасы Шаймағамбетов Әмірбек Бердібекұлы ардагерлерге көрсетілген құрмет үшін алғысын білдіріп, құттықтауын жеткізді.

Тәртіп сақшыларының кәсіби мерекесіне арналған бүгінгі салтанатты шара барысында Полиция департаментінің бастығы полиция полковнигі Ергешов Серік Жүрсінбайұлы сөз сөйледі:

«Сіздерді 23 маусым – Қазақстан полициясының күні мерекесімен шын жүректен құттықтаймын!

Полиция қызметі – үлкен жауапкершілік пен табандылықты талап ететін абыройлы мамандық. Сіздер тәулік бойы халықтың тыныштығын күзетіп, заң мен тәртіптің сақталуын қамтамасыз ету жолында аянбай еңбек етіп келесіздер. Қандай жағдай болмасын қызметтік міндетке адалдық танытып, азаматтардың қауіпсіздігі үшін бар күш-жігерлеріңізді жұмсап жүрсіздер. Бұл – зор құрметке лайық еңбек.

Сіздерге мықты денсаулық, халқымыздың бейбітшілігі мен тыныштығын күзету, Қазақстанды өркендету жолындағы қызметтеріңізге табыс тілеймін! Еліміз аман, жұртымыз тыныш болып, шаңырағымыз ырыс – несібеге толсын!» деді Департамент бастығы.

Шара барысында полиция қызметкерлерінің күнделікті тыныс-тіршілігі мен жетістіктерін бейнелейтін арнайы бейнероликтер көрсетіліп, қызмет барысында ерлік пен кәсібилік танытқан мамандардың жұмыстары көпшілік назарына ұсынылды.

Мерекелік кеш концерттік бағдарламамен жалғасты. Өңірдің өнерпаздары мен шығармашылық ұжымдары сахна төрінде ән шырқап, би билеп, тәртіп сақшыларына көтеріңкі көңіл — күй сыйлады. Патриоттық рухтағы әндер орындалып, ел тыныштығын күзеткен азаматтарға арналған жүрекжарды лебіздер айтылды.

Полиция күні – бұл тек кәсіби мереке ғана емес, қоғам қауіпсіздігін қамтамасыз ету жолында аянбай еңбек етіп жүрген қызметкерлердің еңбегіне көрсетілген құрметтің белгісі. Қызылорда облысында өткен мерекелік шара тәртіп сақшыларының мәртебесін арттырып қана қоймай, олардың халық алдындағы жауапкершілігі мен қызметінің маңызын тағы бір мәрте айқындай түсті.