Сырдария ауданына қарасты Сәкен Сейфуллин ауылында балаларды театр өнеріне баулитын мектепішілік «Таңшолпан» театры жұмыс істейді. Ләйлә Қалыбай жетекшілік ететін театр талай таланттың бала арманының қанат қағуына мүмкіндік сыйлайды. Таяуда өнерпаз оқушылар ауылдық клубта өткен «Театрдың ғажайып әлемі» атты қойылым байқауында бақ сынасты.

 Балалардың өнерге қызығушылығын арттырып, шығармашылық дамуына бағыт беретін, театр мәдениетін дәріптейтін сайысқа орта мектептің 5-7 сынып оқушылары қатысты. Олар сахна мәдениетін жетік меңгергенін байқатты. Тіпті актерлық шеберлігі де жоғары деңгейде қалыптасып келе жатқанын көрсетті. Ал сахна тақырыпқа сай безендіріліп, ұжымның білікті мамандармен топтасқанын байқатқандай.

Білім ошағындағы гуманитарлық пәндер бірлестігі апталығы аясында бірлестік жетекшісі Гауһар Рахменшеева бастама көтеріп, балалардың талантын танытуға, қабілетін дамытуға бағытталған іс-шараны қолға алған. Қойылымдарда Міржақып Дулатұлының «Бақытсыз Жамал», Бейімбет Майлиннің «Күлпаш» романынан, Бердібек Соқпақбаевтың «Менің атым –  Қожа» повесінен, Роза Мұқанованың «Мәңгілік бала бейнесі» шығармасынан, «Қыз Жібек» халық жыры мен Абай Құнанбайұлының қара сөзінен көрініс сахналанды.

Байқау қорытындысымен бас бәйгені 7 «а» сыныбы иеленсе, 5 «б» сыныбы І орынның биігін бағындырды. Ал 7 және 6 «б» сыныптары ІІ орынды еншіледі. 6 және 5 «а» сыныптары үздік үштікті түйіндеп, ІІІ орынды қанжығасына байлады. Барлық жеңімпаз бен жүлдегерге диплом және бағалы сыйлық табысталды.

Айта кетейік, орта мектепте театр үйірмесі үш жылдан бері жұмыс істеп келеді. Бүгінде 30-дан астам оқушы үйірмеге белсенді қатысып, өнерімен өрістеп келеді.

«Qyrdan»—ақпарат