Қазіргі таңда әрбір адамның өмірінде толыққанды тұлға болып қалыптасуында құқықтық тәрбиенің алар орны ерекше. Жасөспірімдер арасындағы және оларға қарсы жасалған қылмыстар қоғамның өзекті мәселелерінің бірі болып отыр.
Қызылорда облысында кәмелетке толмағандар арасындағы құқық бұзушылықтардың алдын алу бағытындағы жұмыстар жүйелі түрде жалғасуда. «Заң мен тәртіп – қауіпсіз балалық шақ кепілі» тақырыбындағы іс-шаралар жоспары аясында Полиция департаменті кешенді профилактикалық шараларды жүзеге асырып келеді.
Жүргізілген жұмыстар өз нәтижесін көрсетуде. 2026 жылдың алғашқы үш айының қорытындысы бойынша жасөспірімдердің қатысуымен жасалған қылмыстар саны 7,1 пайызға төмендеген. Бұл – құқық қорғау органдары мен жергілікті атқарушы биліктің бірлескен жұмысының оңды нәтижесі.
Жыл басынан бері кәмелетке толмағандар мен жастар арасында құқық бұзушылықтың алдын алу бағытында «Жасөспірім», «Балалар түнгі қалада» профилактикалық шаралары өткізілуде.
3164 құқық бұзушылықтың жолы кесіліп, қаңғыбастық пен кезбелікке бейім 71 жасөспірім арнайы бейімдеу орталықтарына орналастырылды.
Түнгі уақытта заңды өкілдерінсіз 2039 жасөспірім жүріп, 100-ден аса кәсіпкер кәмелетке толмағандардың түнгі уақытта ойын-сауық орындарында болуына жол берген.
«Өңірдегі білім беру ұйымдарында да профилактикалық жұмыстар қарқынды жүргізілуде. Полиция департаментінің басшылығы мен аудандық бөлім жетекшілері мектептер мен колледждерде оқушылар және студенттермен кездесулер өткізіп, құқықтық мәдениетті қалыптастыруға ерекше көңіл бөлуде. Кездесулер барысында заң талаптарын сақтау, қоғамдық тәртіпті бұзудың салдары, сондай-ақ интернет кеңістігіндегі қауіпсіздік мәселелері кеңінен түсіндірілуде.
Әсіресе, соңғы уақытта өзекті мәселелердің біріне айналған буллинг, кибербуллинг және лудомания тақырыптары да назардан тыс қалмай отыр. Жастармен ашық форматта өткен кездесулерде бұл мәселелер жан-жақты талқыланып, мамандар тарапынан нақты түсіндіру жұмыстары жүргізілуде» деді Департамент бастығы полиция полковнигі Серік Ергешов.
Бүгінде полиция бұл бағыттағы жұмысты күшейте отырып, қауіпсіз қоғам қалыптастыруды басты міндеттердің бірі ретінде айқындап отыр.