Мәртебелі мамандықтың майталманы айтқан оймақтай ой мен кеңесі жас қызметкерлер үшін бағыт-бағдар беретін өмірлік мектеп. ҚАЖ департаментіне қарасты №68 мекемесінің жеке құраммен жұмыс жөніндегі бөлімшесінің ұйымдастыруымен “Отбасы” орталығында сала ардагерімен кездесу өтті.

Төрден орын алған құрметті қонақ – жылдар бойы жарғақ құлағы жастыққа тимей, салада табан аудармастан қызмет еткен Ахметов Талғат Шәкіұлы. Жүздесуге жиылған жас қызметкерлерге есті естелігімен бөліскені емен-жарқын әңгімені жандандырды. Дайын дәрісті емес, өзі бастан өткерген сан тарау жол жайында сөз тарқату – қызметкерлерге тәжірибе болғаны анық.

Ашық алаңда абдырап қалмаған жастар көкейдегі сұрақтарын жаудырды. Яғни, Талғат Шәкіұлының кәсіби жолда қабылдаған шешімі мен “әттеген-айы”, қызметтік кезеңінде үлгі тұтқан арда азаматтардан бастап, Қылмыстық-атқару жүйесінің дамуына дейінгі салмақты сауалдар қамтылды. Ал, сала ардагерінің байыпты жауабы заңмен қатар арға сүйенетінін алға тартты.

– Салада сабақтастық болғаны бізді қуантады. Аға буынның ақылынан азық алсақ, тәжірибеміз толыса түсетіні ақиқат. Бүгінгі басқосуда жылы жымиыс та, әдемі әңгіме де өрбіді. Түйгеніміз көп, — дейді Режим және күзет бөлімінің бақылаушысы әділет сержанты Ернұр Еркін.

Келелі кездесудің көркі әсем әнмен ашыла түсті. Бұған Режим және күзет бөлімінің ақпарат және байланыс тобының бақылаушысы әділет сержанты Ақниет Қалмұратовтың қоңыр домбыраны күмбірлетіп, үш бірдей әнді тамылжыта орындағаны дәлел.

Басқосу –  бір сағаттық әңгіме ғана емес, жылдармен жинақталған тәжірибенің, парасатты пайымның жемісі болғаны анық. Жас қызметкерлердің түйсікке түртіп алғаны да біраз деп сенеміз.