Жалағаш ауданына жұмыс сапары барысында ҚР Парламенті Сенатының депутаттары, “AMANAT” партиясының мүшелері Наурызбай Байқадамов пен Руслан Рүстемов және партияның облыстық филиалының төрағасы Алмасбек Есмаханов ауданның ауыл шаруашылығы бағытындағы жұмысшыларымен Таң ауылында кездесу өткізді.
Басқосу барысында ауыл еңбеккерлері тарапынан егінге жіберілетін судың жеткіліксіздігі және өсірілген өнімнің сатылмай қалуы секілді өзекті мәселелер көтерілді. Сенат депутаттары бұл жағдайларды назарға алып, тиісті министрліктер мен мекемелер деңгейінде қаралатынын жеткізді.
«Ауыл шаруашылығы – ел экономикасының негізгі тірегі. Диқандардың мәселесі – мемлекеттің де мәселесі. Судың жетіспеушілігі мен өнімнің сатылмай қалуы – жүйелі шешімді қажет ететін түйткілдер. Бұл бағытта тиісті жұмыстар атқарылады», – деді Сенат депутаты Руслан Рүстемов.