Кітап оқу мәдениеті ықылым заманнан бері адам бойынан ажырамаған. 23 сәуір – Ұлттық кітап күніне орай Қармақшы аудандық кітапханасы «100 кітап – 100 туынды: тіл мен кітап егіз ұғым» атты байқау өткізді. Байқауға аудандағы 18 кітапхана қатысып, өзара бақ сынасты.

– Айта кетейік, 23 сәуір – Қазақстанда Мемлекет басшысы Қасым-Жомарт Тоқаев бастамасымен бекітілген Ұлттық кітап күні ретінде атап өтіледі. Бұл мереке аясында еліміздің барлық өңірінде кітап оқу мәдениетін насихаттау және зияткерлік әлеуетті арттыру мақсатында кітап апталығы ұйымдастырылуда, – дейді ұйымдастырушылар.

Аталған байқауда ІІІ Интернационал ауылдық кітапханасының оқырмандары белсенділік танытып, жоғары деңгейде өнер көрсетті. Соның нәтижесінде олар Қармақшы аудандық кітапханасының директоры Г.Қаниеваның Алғыс хаттарымен марапатталды.

Іс-шара барысында қазақ әдебиетінің көрнекті өкілі Сафуан Шаймерденовтың «Инеш» романы желісі бойынша әсерлі қойылым сахналанды. Қойылымға №108 орта мектебінің 10-сынып оқушылары Нұрай Өмірзақова, Дильнара Бағдатқызы, Кәусар Қалдыбекова қатысып, өз өнерлерін жоғары деңгейде көрсетті.

Осындай мазмұнды шаралар жастардың кітапқа деген қызығушылығын арттырып, рухани дамуына оң ықпал ететіні сөзсіз.

Барша қатысушыларды жетістіктерімен шын жүректен құттықтаймыз! Алар асуларыңыз биік, шығармашылық табыстарыңыз арта берсін! Кітаппен достықтарыңыз мәңгі жалғасып, білім мен өнер жолында үлкен жетістіктерге жете беріңіздер!