Қазіргі таңда қоршаған ортаның тазалығы – қоғамдағы өзекті мәселелердің бірі. Әсіресе ол тұрғындардың мәдениеті мен жауапкершілік деңгейін көрсететін маңызды көрсеткіш саналады. Алайда көшелерде, саябақтарда, аялдамалар мен демалыс орындарында бейберекет тасталған қоқыстардың жиі кездесуі қоғам үшін алаңдатарлық жағдай. Бір қарағанда елеусіз көрінетін мұндай әрекеттер қоршаған ортаға зиян келтіріп қана қоймай, қоғамдық тәртіп пен қала келбетіне де кері әсерін тигізеді.
Осы тақырып аясында қоғамдық орындарға қоқыс тастағаны үшін көзделген жауапкершілік туралы толығырақ білу мақсатында Қызылорда қалалық полиция басқармасының Тергеу бөлімінің тергеушісі, полиция аға лейтенанты Алдияр Рустамовпен жолыққан едік.
Полиция қызметкерінің айтуынша, қоғамдық орындарға қоқыс тастау Қазақстан Республикасының заңнамасына сәйкес әкімшілік құқық бұзушылық болып есептеледі. Көшелерге, саябақтарға, аялдамаларға, аулаларға және өзге де демалыс орындарына қоқыс тастау қоршаған ортаға зиян келтіріп, қоғамдық тәртіптің бұзылуына себеп болады.
Сұхбат барысында аға лейтенант Алдияр Рустамұлы азаматтардың көбіне қағаз, бөтелке, темекі тұқылы, полиэтилен пакет секілді тұрмыстық қалдықтарды арнайы орындарға тастамайтындығын атап өтті. Мұндай құқық бұзушылықтар үшін заң аясында ескерту жасалуы немесе әкімшілік айыппұл салынуы мүмкін. Сонымен қатар, заңбұзушылық қайталанған жағдайда жауапкершілік те күшейе түседі.
– Қоғамдық орындардың тазалығы – баршаға ортақ мәдениет пен жауапкершіліктің көрінісі. Әр азамат өз әрекетіне жауапкершілікпен қарап, қоқысты арнайы жәшіктерге тастауы қажет. Бұл – тек тазалық мәселесі ғана емес, қоғамдық тәртіп пен қоршаған ортаға деген құрметтің белгісі, – дейді полиция аға лейтенанты.
Сонымен қатар, маман қоғамдық орындарды ластаудың табиғатқа ғана емес, тұрғындардың денсаулығына да кері әсер ететінін жеткізді. Қоқыстың шамадан тыс жиналуы түрлі жұқпалы аурулардың таралуына себеп болып, қаланың санитарлық жағдайына зиян тигізуі мүмкін. Бұдан бөлек, бей-берекет шашылған қоқыс қаланың көркін бұзып, тұрғындардың жайлы өмір сүруіне қолайсыздық тудырады.
Қоғамдық орындардың тазалығын сақтау – әрбір азаматтың міндеті әрі мәдениетті қоғамның басты белгілерінің бірі. Тазалыққа бейжай қарамай, қоқысты арнайы жәшіктерге тастау арқылы біз қоршаған ортаны қорғауға, туған қаламыздың көркеюіне және болашақ ұрпаққа таза орта қалдыруға өз үлесімізді қоса аламыз. Себебі тазалық – тек тәртіптің емес, адам мәдениетінің де айнасы.
Өңірде тазалық іс-шарасының басым көпшілігі «Таза Қазақстан» республикалық акциясы аясында өтуде. Өңірдің санитарлық жағдайын жақсарту және экологиялық мәдениетті қалыптастыру бағытындағы кешенді жұмыстар жүйелі түрде жалғасуда.
Полиция қызметкерлері жергілікті атқарушы органдармен бірлесіп, аумақтарды абаттандыру қағидаларының сақталуын тұрақты бақылауда ұстап келеді. Қатты тұрмыстық қалдықтарды шығару бойынша келісімшарттары жоқ заңды тұлғаларға қатысты қолданыстағы заңнамаға сәйкес тиісті шаралар қабылдануда. Сонымен қатар тұрғындар арасында санитарлық талаптарды сақтау және экологиялық сауаттылықты арттыру мақсатында тұрақты түрде түсіндіру жұмыстары жүргізілуде.
Жыл басынан бері қабылданған шаралардың нәтижесінде Қызылорда аумағында 192 заңсыз қоқыс орны анықталып, оның 163-сі жойылды. Оның ішінде Белкөл кенті аумағындағы стихиялық қоқыс орны толықтай тазартылды. Қоғамдық тәртіп пен тазалықты сақтау мәселесі тұрақты бақылауда. Акция басталғалы бері облыс көлемінде 67 мобильдік топ құрылып, күнделікті рейдтік іс-шаралар өткізуде. Нәтижесінде бүгінгі күнге дейін 26 мыңнан астам әкімшілік құқық бұзушылық анықталды.
Атап айтқанда:
🔹 белгіленбеген орындарға қоқыс тастау бойынша – 2 мыңнан астам;
🔹 қоғамдық орындарды ластау бойынша – 11 мыңнан астам;
🔹 абаттандыру қағидаларын бұзу бойынша – 13 мың құқық бұзушылық тіркелді.
— «Таза Қазақстан» акциясының басты мақсаты – өңірде тазалық мәдениетін қалыптастырып, қоршаған ортаны қорғау және тұрғындар үшін қолайлы өмір сүру ортасын қамтамасыз ету. Бұл бағыттағы жұмыстар алдағы уақытта да үздіксіз жалғасады. Әрбір тұрғын тазалық пен қоғамдық тәртіпті сақтауға жауапкершілікпен қарауы қажет, – деп атап өтті полиция өкілдері.
Жүргізіліп жатқан шаралар өңірдің экологиялық ахуалын жақсартуға және тұрғындардың қоршаған ортаға деген жауапкершілігін арттыруға бағытталған.
Айжан ТЕМІРХАНОВА,
Қорқыт ата атындағы
Қызылорда университетінің студенті