Шаруаларға таныстыруға әкелген қытайлық «Lovol» компаниясының комбайны атыздың ортасында қақалып, тоқтап қалды. Мұнда Сенат депутаты Руслан Рүстемов, облыстық ауыл шаруашылығы басқармасының басшысы Талғат Дүйсебаев және облыстың алдыңғы қатарлы шаруашылықтарының төрағалары мен Ыбырай Жахаев атындағы Қазақ күріш шаруашылығының ғылыми-зерттеу институтының басқарма төрағасы Сұлтанбек Тәуіпбаев қатысты.

Әлбетте ә дегеннен «Сыр сұлуы» күріш сортына орақ салу рәсімін күткен қонақтар техниканың біздің жерге соншалықты тиімді емес екенін аңдамаса керек. Бірақ атыздың бірінші басынан екінші басына барамын дегенше шаруасы шатқаяқтап қалды.

Айтпақшы, бұл комбайн біздің дәстүрлі егін жинау бағытында емес. Өсіп тұрған күрішті орып, дәнінен ажыратып, дәнін ыдысына, сабағын турап артқы жағынан ұнтап шығарады. Бұл біріншіден, орылып, бірнеше күн кепкен дән емес, күріш кейін қырманға барған соң бүлінуі ғажап емес. Екіншіден, сабанды ұнтағаннан пайда көп емес. Тек алқапты тазартып жіберуге болмаса, халыққа тиімсіз. Өйткені, күріштің сабанын төрт түлігіне шөп ретінде, баспананың төбесіне үйді жылы ұстап тұру үшін құрылыс материалы ретінде пайдаланған ел мұның қажетсіз екенін тап басып танығандай.

Шаруашылық басшыларының көпшілігі бір маусымда бар-жоғы 192 гектар жерге қызмет ететін шағын комбайнға қызығушылық танытпады. Бағасы да қалтаға қонымсыз, 22 миллион теңге тұрады екен. Ал оның қызмет көрсететін ауқымы 2 метр 80 сантиметрден аспайды.

Дәулет ҚЫРДАН