Қала көшесімен келе жатып, айналаны гүлсіз елестетіп көрдіңіз бе? Көздің жауын алатын түрлі-түсті гүлдер болмаса, қаланың сәні де солғын тартатындай әсер қалдырады. Шаһар тіршілігіне табиғаттың әсемдігін сыйлап тұрған да – осы гүлдер . Олар тек көрік үшін ғана емес, тұрғындарға жайлы орта қалыптастырып, қалаға ерекше ажар сыйлайды. Соңғы жылдары Қызылорда қаласы да жылдан-жылға көркейіп, жасыл—желекке және гүлге бөленіп келеді.
Биыл Қызылордада көгалдандыру және абаттандыру жұмыстары ерте басталды. Арнайы мамандар қоғамдық орындарды, көшелер мен демалыс аймақтарын көркейтуге белсенді кірісті. Биыл қала бойынша 44 980 шаршы метр аумаққа гүл егу жоспарланған. Көлемі 27 000 шаршы метр жерге гүл көшеттері отырғызылды. Ал түп санына келсек, 25 000 түптен астам гүл егілген. Бұл – қаланың көркін арттыруға бағытталған жүйелі жұмыстардың айқын көрінісі.
– Негізі біздің мекемеде 200-дің шамасында адам жұмыс істейді. Ал маусымның қызған шағында 250-ден астам адам еңбек етеді. Ағаштың бірнеше түрін егеміз. Өңірдің табиғи ерекшелігіне қарай таңдалған өсімдіктер бар. Суару автоматтандырылған. Ағаштарды тамшылату әдісімен суарамыз. Еккен газонымызды көрдіңіз бе, жап-жасыл болып, қаланың көркі мен ажарын келтіруде. Ал мұнан бөлек, ағаштарымыздың да жайқалып тұрғанын байқаған боларсыздар. Ектік, болды демей, оларды жыл сайын күтіп-баптап отырамыз, – дейді «Kazstroycapital LTD Kyzylorda» мекемесі директорының орынбасары Алтай Мұқанов.
Сыр өңірінің климаты ыстық болғандықтан, мұнда аптапқа төзімді гүл түрлері таңдалады. Алайда олар тек ыстыққа шыдамдылығымен ғана емес, ұзақ уақыт бойы жайқалып өсіп, айналаға сән беруімен де ерекшеленеді. Қалада петуния, шапыран гүл, сальвия, циния және гладиолус сияқты алуан түрлі өсімдіктер егіледі. Түрлі-түсті гүлдер қала көшелеріне ерекше көрік беріп, тұрғындардың көңіл күйіне де жағымды әсер етеді.
Гүл көшеттері негізінен орталық көшелер бойына, саябақтар мен аллеяларға, ескерткіштер маңына және тұрғындар жиі жиналатын орындарға отырғызылады. Биыл тарихи ескерткіштер мен демалыс аймақтарының айналасын көркейтуге ерекше көңіл бөлінген. Мұндай жұмыстар қаланың келбетін жаңартып қана қоймай, тұрғындарға жайлы әрі әсем орта қалыптастыруға мүмкіндік береді.
Әр гүлдің артында үлкен еңбек жатыр. Қаланы көркейтіп жүрген көгалдандыру мамандары күн сайын егілген өсімдіктерді суарып, баптап, олардың жайқалып өсуіне жағдай жасайды. Таңнан кешке дейін тынымсыз еңбек ететін жандардың арқасында Қызылорда көшелері көз тартарлық күйге еніп отыр. Сондықтан олардың еңбегі әрдайым құрметке лайық.
Қала тұрғындарының да бұл өзгерістерге деген көзқарасы ерекше. Бірнеше тұрғынның пікірін білгенімізде, олардың көпшілігі соңғы жылдары Қызылорданың бұрынғыдан да көркейіп, көшелердің ажары айтарлықтай ашылғанын атап өтті. Әсіресе, түрлі-түсті гүлдер егілген орталық көшелер мен демалыс орындарының қалаға ерекше сән беріп тұрғанын жеткізді. Тұрғындардың бірі Науат Боранбаева кешкі уақытта гүлге көмкерілген көшелермен серуендеу көтеріңкі көңіл күй сыйлап, қалаға деген сүйіспеншілікті арттыра түседі деп жеткізді. Сондай-ақ Науат ханым мұндай көгалдандыру жұмыстары алдағы уақытта да жалғасып, Қызылорданың одан әрі гүлдене беруіне тілектестік білдірді.
– Қалада кешкі серуенде кісі қызығарлықтай келбет бар. Қызылордамыз дамып, жайнап келеді. Көрікті гүлдер мен жайқалған ағаштар көңілімізді бір серпілтіп тұрады. Алдағы уақытта да осындай ерекше кейпінен танбайтынына сенеміз. Туған қаламызды жақсы көреміз, оның әрбір жарқын қадамы кеудемізде мақтаныш сезімін ұялатады, – дейді Науат Боранбаева.
Гүл – қаланың ажарын ашып, ерекше сән беретін табиғи әсемдік. Биыл жүргізіліп жатқан көгалдандыру жұмыстары мен егілген мыңдаған көшет Қызылорданың келбетін бұрынғыдан да көркейте түсті. Бүгінде гүлге көмкерілген көшелер мен жасыл-желекке бөленген демалыс орындары тұрғындарға ғана емес, қала қонақтарына да ерекше әсер сыйлайды. Гүлдер шаһарға көрік беріп қана қоймай, адамдардың көңіл-күйіне жағымды әсер етіп, табиғатқа деген жанашырлықты арттырады. Осындай игі бастамалардың нәтижесінде Қызылорда жылдан-жылға жаңарып, ажары айшықталған әсем шаһарға айналып келеді. Сондықтан табиғатты аялау, егілген гүлдерді қорғау және айналаны таза ұстау — барша тұрғынға ортақ жауапкершілік.
Ақнұр АРЫСБАЙ,
Гүлсанам МҰРАТБЕК,
Қорқыт ата атындағы
Қызылорда университетінің студенттері