«Наурызнама онкүндігі» аясында 14 наурыз – Көрісу күні мерекесіне орай Қызылорда облысы Полиция департаменті бастығының орынбасары  полиция полковнигі Оралбек  Омаров ішкі істер органдарының ардагерлерінің шаңырағына арнайы барып, ақжарма тілегін арнады.

Ұлттық дәстүрге сай ұйымдастырылған бұл тағылымды кездесуде сала ардагерлеріне ерекше ілтипат білдіріліп, олардың қоғам тыныштығы мен ел қауіпсіздігін қамтамасыз ету жолындағы көпжылдық еңбегі жоғары бағаланды.

Кездесу барысында саналы ғұмырын құқық қорғау саласына арнаған ҚР ІІМ Құрметті ардагерлері – тыл ардагері, 91 жастағы Төлеш Әлиев, Мұхтаровтар полицейлер әулетінің ақсақалы, 87 жастағы Әбділла Мұхтар және Сыр сақшыларының ұстазы Тастемір  Рахимовқа құрмет көрсетілді.

Ардагерлер де өз кезегінде қызмет жолындағы естеліктерімен бөлісіп, тәртіп сақшысы болудың жауапкершілігі мен маңызын тілге тиек етті. Олар жас буынға адалдық пен табандылықтың, Отанға деген шынайы қызметтің қашанда биік тұруы керектігін атап өтті.

Полиция департаментінің өкілдері ардагерлерге зор денсаулық пен ұзақ ғұмыр тілеп, олардың өмірлік тәжірибесі мен өнегелі жолы жас қызметкерлер үшін әрдайым бағыт-бағдар болатынын жеткізді. Осындай тағылымды кездесулер аға буынға деген құрметті арттырып, ұрпақтар арасындағы сабақтастықты нығайта түседі.