Қоғамдағы заң мен тәртіп – тұрғындардың қауіпсіздігін қамтамасыз ететін басты қағида. Сәйкесінше қоғамдық орындардағы тәртіпке қатысты талаптар да күшейген. Солардың бірі – қоғамдық орындарда бетті тұмшалауға қатысты ережелер.
Бүгінде қоғамдық орындарда бет-ауызды тұмшалап жүруге болмайды. Тыйым балаклаваға, медициналық мақсаттан тыс маскаға, никабқа және адамның жүзін анық көруге кедергі келтіретін өзге де киім үлгілеріне қатысты.
Бұл талап — дінге қарсы бағытталған шара емес, керісінше, қоғамдық қауіпсіздікті қамтамасыз ету үшін қабылданған шешім.
Осы мақсатта Қызылорда облысында полиция қызметкерлері қоғамдық орындарда адамның бет-әлпетін тануға кедергі келтіретін киім түрлерін киюге тыйым салу жөнінде түсіндіру жұмысын жалғастыруда. Бұл жұмыс құқық бұзушылықтардың алдын алу және қоғамдық қауіпсіздікті күшейту мақсатында жүргізілуде.
Барлық қабылданып жатқан шаралар қолданыстағы заңнамаға толық сәйкес жүргізіліп, азаматтардың құқықтары мен бостандықтарын, соның ішінде ар-ождан және діни сенім бостандығын сақтау талаптарына сай жүзеге асырылуда.
Аталған жұмыстар аясында тәртіп сақшылары тұрғындармен кездесулер өткізіп, заң талаптарын түсіндірді. Ақпараттық жадынамалар таратып, азаматтардың сұрақтарына жауап берді. Әсіресе адамдар көп шоғырланатын орындарда құқық бұзушылықтардың алдын алуға ерекше көңіл бөлінді.
Полицейлер заң талаптарын бұзғаны үшін заңнамаға сәйкес жауапкершілік қарастырылғанын еске салып, облыс тұрғындары мен қонақтарын қоғамдық қауіпсіздікті қамтамасыз етуге бағытталған шараларға түсіністікпен қарап, заң талаптарын қатаң сақтауға шақырды.
Тәжірибе көрсеткендей, бет-жүзді жабатын сәндік элементтерді көбіне жастар қолданады. Осыған байланысты негізгі түсіндіру жұмыстары сауда-ойын-сауық орталықтарында және білім беру ұйымдарында жүргізілуде.
Полицейлердің айтуынша бұл шаралар ең алдымен алдын алу сипатына ие. Алғаш рет құқық бұзушылық жасаған азаматтарға ескерту беріледі. Қайталанған жағдайда ғана әкімшілік жауапкершілік қарастырылып, 10 айлық есептік көрсеткіш көлемінде айыппұл салынады.
Бет тұмшалау мәселесі – күрделі әрі көпқырлы тақырып. Ол тек киім мәселесі емес, сонымен қатар құқық, қауіпсіздік, мәдениет арасындағы тепе-теңдікті қамтиды.
Қоғамда тұрақтылық пен қауіпсіздікті сақтау үшін белгілі бір шектеулер қажет. Алайда бұл шектеулер азаматтардың негізгі құқықтарын бұзбауы тиіс. Осы ретте әр адам өз құқықтары мен міндеттерін біліп, заң талаптарын сақтауы маңызды. Себебі қоғамдық қауіпсіздік – ортақ құндылық.