Бүгін Сырдария ауданы мәдениет саласы ардагерлерінен құрылған «Алтын қазына» ансамблі мен аудан өнерпаздарының қатысуымен ұйымдастырылған «Сұлу Сырдан – Жасампаз Жайыққа» атты мерекелік концерттік бағдарлама Батыс Қазақстан облысы, Орал қаласындағы «Алтын Орда» мәдениет үйінде жоғары деңгейде өтті.

Сыр елінің рухани мұрасын, ұлттық өнері мен мәдениетін насихаттаған концерт көрерменнің ыстық ықыласына бөленіп, өнерсүйер қауымға ерекше әсер сыйлады. Кеш барысында Сыр өңірінің ән-жыры, күйлері мен тағылымды шығармалары орындалып, мәдениет саласының ардагерлері мен аудан өнерпаздары өз өнерлерімен көпшіліктің зор қошеметіне ие болды.

Өнер сапарының табысты өтуіне әрдайым мәдениет пен руханият саласына қолдау көрсетіп келе жатқан Сырдария ауданының әкімі Берік Әбдіғаппарұлының қолдауы ерекше серпін берді.

Концерт қорытындысында Батыс Қазақстан облысы әкімінің ықылас гүлі табысталып, облыстық мәдениет, тілдерді дамыту және архив ісі басқармасының Алғыс хатымен «Алтын қазына» ансамблі марапатталды. Бұл – өнер ұжымының ұлттық мәдениетті дамытуға қосқан үлесі мен көпжылдық еңбегіне көрсетілген жоғары құрмет.

Сыр мен Жайықты өнер арқылы табыстырған тағылымды кеш қос өңірдің мәдени байланысын нығайтып, көрермен жүрегінде жарқын әсер қалдырды.