Сырдария ауданында облыстық Қазақстан халқы Ассамблеясы жанындағы Ғылыми-сарапшылық топ мүшелерінің қатысуымен «Еліміздің басты құндылығы – бірлік пен келісім» тақырыбында мазмұнды кездесу өтті.

Шараның мақсаты – ел ішіндегі татулық пен қоғамдық келісімнің маңыздылығын насихаттау, этносаралық қатынастар мәдениетін нығайту және бірлікті арттыру бағытында пікір алмасу болды.

Кездесуді Сырдария ауданы әкімінің орынбасары Димаш Байдушев модератор ретінде жүргізіп, аудан көлемінде этносаралық қатынастарды дамыту және қоғамдық келісімді қалыптастыру бағытында атқарылып жатқан жұмыстарға тоқталды.

Жиын барысында облыстық Ақсақалдар кеңесінің мүшесі Жақсыбай Жакеев, Қорқыт Ата атындағы Қызылорда университетінің аға оқытушысы, заң ғылымдарының магистрі, облыстық ҚХА жанындағы Ғылыми-сарапшылық топтың мүшесі Қуаныш Жарекеев, сондай-ақ Сырдария аудандық Ақсақалдар кеңесінің мүшесі Марат Омаров өз ой-пікірлерін білдіріп, қоғамдағы тұрақтылық пен бірліктің маңызын атап өтті.

Кездесуге сондай-ақ Қызылорда облысының «Қоғамдық келісім» коммуналдық мемлекеттік мекемесінің аға сарапшысы Бауыржан Жанұзақов қатысып, Ассамблея жанындағы Ғылыми-сарапшылық топтың мақсат-міндеттері мен өңірде жүзеге асып жатқан жобалар жөнінде ақпарат берді.

Кездесу соңында қатысушылар елдің бірлігі мен ынтымағын сақтау жолында бірлесіп жұмыс істеудің қажеттілігіне тоқталып, ұсыныстар мен пікірлерін ортаға салды.

Шараға аудан әкімдігі мен қоғамдық даму бөлімінің өкілдері, Ақсақалдар мен Аналар кеңесінің мүшелері, медиаторлар, белсенді жастар және этнос өкілдері қатысты.