Сырдария ауданының үстімен өтетін «Қызылорда – Жалағаш» облыстық маңызы бар автомобиль жолының 47,9 шақырымындағы көпірді күрделі жөндеу жұмысы қарқынды жүруде. Аудандардың арасын жалғайтын көпір заманауи үлгіде нық салынуда. Аудан әкімі Берік Сәрменбаев пен облыстық мәслихат депутаты Жұмабек Ембергенов аталған көпірдегі құрылыстың жай-жапсарымен танысып қайтты.
Қазіргі таңда нысанда құрылыс-монтаж жұмыстары жоспарға сәйкес жүргізілуде. Жоба аясында көпірдің негізгі конструкцияларын жаңғырту және көлік қозғалысының қауіпсіздігін қамтамасыз ету бағытында кешенді жұмыстар атқарылуда.
Аталған жоба бойынша құрылыс-монтаж жұмыстарын мердігер мекеме – «Сервис НС» ЖШС жүргізуде. Техникалық қадағалаушы «Ақмешіт Элит Строй» серіктестігі де өз міндетін толық атқарып келеді. Құрылыс жұмыстарының жалпы ұзақтығы алты айға белгіленген.
Аудан әкімі жауапты мердігер мекемелерге құрылыс сапасын қатаң бақылауда ұстап, жұмысты белгіленген мерзімде аяқтауды тапсырды. Сонымен қатар, жол қозғалысына қолайсыздық туғызбау және тұрғындардың қауіпсіздігін қамтамасыз ету мәселесіне ерекше назар аудару қажеттігін атап өтті. Әрі өңірдегі құрылыс нысандарының әрбірінің сапасы қатаң бақылауда болатынын атап өтті.
Сырдария ауданы әкімінің баспасөз қызметі