Ертеде, жасыл алқап пен биік таулардың ортасында Өмір жолы деген кең дала болыпты. Бұл даладан әр адам өз жолын өзі таңдап өтеді екен.

Сол далада Айбар деген жас жігіт өмір сүріпті. Оның арманы көп, жүрегі таза, бірақ тәжірибесі аз еді. Бір күні ол екіге айырылған жолға кезігіпті. Бірінші жолдың басында қара бұлт үйіріліп, тұман басып тұрса, екінші жол күн сәулесіне малынып, гүлдер жайқалыпты.

Қара жолдың жанында Алдамшы көлеңке тұр екен. Ол Айбарға:

— «Бұл жол жеңіл, еш қиындықсыз, ләззатқа толы», — деп сыбырлапты.

Ал жарық жолдың басында Ақыл мен Үміт қатар тұрып:

— «Бұл жол еңбек пен сабырды талап етеді, бірақ соңы бақытқа бастайды», — депті.

Айбар алғашында қара жолға бір қадам жасайды. Бірақ сол сәтте оның жүрегі ауырлап, көз алды бұлдырапты. Ол сол кезде:

— «Мен болашағымды тұманға тапсырмаймын», — деп ойлап, кері шегінеді.

Ол жарық жолды таңдаған сәтте, жол бойында спорт алаңдары, білім ордалары, дені сау, жүздері жарқын адамдарды көреді. Әр қадам сайын оның бойы күшке, сенімге тола бастайды.

Уақыт өте Айбар өз арманына жетіп, елге пайдалы азамат болып өседі. Ол кейінгі жастарға қарап:

— «Есірткі — еркіндікті ұрлайды. Ал дұрыс таңдау — өмірді сыйлайды», — деп айтып жүреді екен.

Содан бері бұл далада бір жазу қалыпты:

«Өмір — бір-ақ рет беріледі.

Дұрыс жолды таңда».

Қармақшы ауданы

Шоқан Уәлиханов атындағы №26 орта мектебі

Алтынбайқызы Мерей 10А сынып оқушысы

Жетекшісі: Калдыгулова Акнур