Таза Қазақстан: «нөлдік төзімділік» қағидаты аясында құқық бұзушылар жауапкершілікке тартылды. Қызылордада «Таза Қазақстан» республикалық экологиялық акциясы аясында қоғамдық тәртіп пен тазалықты сақтау бағытында жүйелі жұмыстар жүргізілуде.

Қызылорда қаласында Жедел басқару орталығының бейнебақылау камералары арқылы қоғамдық орында шемішке шағып, айналасын ластаған азаматтар анықталды. Оларға қатысты қолданыстағы заңнамаға сәйкес тиісті шара қолданылды.
Сондай-ақ қала көшелерінің бірінде белгіленбеген орындарға қоқыс тастаған 11 азамат бейнекамералардың көмегімен анықталып, әкімшілік жауапкершілікке тартылды.
Полиция қызметкерлері әрбір азаматты қоғамдық тәртіпті сақтауға, тазалыққа жауапкершілікпен қарауға шақырады. Тіпті болмашы болып көрінетін құқық бұзушылықтардың өзі қоғамға кері әсерін тигізетінін естен шығармау қажет.

Жыл басынан бері полиция қызметкерлері абаттандыру қағидаларын бұзудың 3491 дерегінің жолын кесті. Сонымен қатар ұсақ бұзақылықтың 301 фактісін анықтады. Ұсақ бұзақылық – қоғамдық тәртіпке қол сұғатын әкімшілік құқық бұзушылықтардың ең кең таралған түрлерінің бірі. Бұл санатқа қоғамға құрметсіздік танытатын әр түрлі заңсыз әрекеттер жатады.

«Нөлдік төзімділік» қағидаты – кез келген құқық бұзушылыққа жол бермеу арқылы қоғамдық қауіпсіздікті нығайтудың маңызды тетігі.
«Заң және тәртіп» қағидатын басшылыққа ала отырып, әрбір азамат «Таза Қазақстан» республикалық экологиялық акциясы бастамасын қолдау арқылы тәртіпті, жауапкершілігі жоғары ұрпақ қалыптастыруға өз үлесін қоса алады.