Қызылордада республикалық «Таза Қазақстан» экологиялық акциясында баса маңызды роль атқаратын коммуналдық мекемелер арнайы техникалармен жарақтанды. Бүгін облыс әкімі Мұрат Ергешбаев Президент саябағында өткен жиында аталған салаға 37 арнайы техниканың кілтін табыстады.

– Мемлекет басшысы Қасым-Жомарт Кемелұлы атап өткендей: «Тазалық әр адамнан, әр үйден, әрбір көше мен әр қаладан басталуы керек. Өйткені, «Таза Қазақстан» – бір күндік науқан емес. Бұл – біздің өмір салтымыз».

Президентіміздің бұл игі бастамасы аясында Сырдың бас шаһары – Қызылордада ауқымды жұмыс жүйелі атқарылып келеді. Аймақ тұрғындары да елді мекендердің тазалығы мен көркеюіне ерекше үлес қосуда. Туған өлкеміз өзге өңірлерге үлгі болып, тазалық жаршысы атанды.

Осы шара тек тазалықты ғана емес, елдіктің белгісін, ауызбірлік пен ынтымақты паш етті. Бұл – біздің нағыз жасампаз мекен екеніміздің айқын айғағы, – деді Мұрат Нәлқожаұлы.

Рәсімде облыстық ардагерлер кеңесінің төрағасы Серік Дүйсенбаев сөз сөйледі. «Таза Қазақстан» бағдарламасын өңірде нәтижелі жүзеге асыруға белсене атсалысып, қаланың тазалығы мен көркеюіне үлес қосып жүрген бірқатар қызметкерге облыс әкімінің Алғыс хаты табысталды.

Айта кетейік, берілген 37 техниканың 32-сі «Қызылорда тазалығы» мекемесіне берілді. Оның ішіндегі 15-і тұрмыстық қалдықтарды тасуға арналса, 5-еуі қысқы және жазғы мезгілге арналған аралас қызмет техникасы және 12-сі көше тазалығына арналған.

– Қазіргі таңда техника қызу жұмысқа кірісті. Өздеріңіз білесіздер, қаланың ауқымы жыл сайын үлкейіп жатыр. Сондықтан осы үлкен көлемді қамтамасыз ету үшін жұмыс күші, техника күші де керек. 2022 жылдан бері мекеменің бойына қан жүріп, қайтадан жарақтана бастадық. Енді осы күні біздің техникаларымыз 80 пайызға жаңардық. Жаз, қыс мезгілдерінде жұмыс істейтін техникаларымыз да, қоқыс таситын, жаяу жүргіншілер жолын тазартатын түрлі техникаларға қол жеткізіп отырмыз. Екі шаңсорғыш техника келді. Олар бордюрдің жиегіндегі шаңды сорады, әрі ертең күзде жерге түскен жапырақтардан тазартады. Біздің өңірдің табиғатына сай қажетті техниканы алып жатырмыз. Әрине, қазір ХХІ ғасыр, жаңа технология ғасыры дейміз. Бұрын жаяу жүргіншілер жолын қолдап сыпырып жүрсе, енді оны да техника атқаратын болды. Адамға күш түспей, техникамен автоматтандырып жатсақ, ол – біз үшін жетістік, – дейді «Қызылорда тазалығы» мекемесінің директоры Сапарғали Асылбеков.

Ал «Қызылорда су жүйесінің» автопаркі вакумдық ассенизаторлармен және жылжымалы жөндеу техникаларымен толықты. Озық техникалар коммуналдық саланың жұмысын айтарлықтай жеңілдетіп, тұрғындарға көрсетілетінқызмет сапасын арттыра түседі.

Айта кетейік, кейінгі жылдары барлық саланыматериалдық-техникалық жағынан жарақтандыруғаерекше басымдық берілді. Жаңа автобустаралынып, қоғамдық көлік мәселесі шешілді. Мектеп оқушыларын тасымалдауға автобустар, денсаулық сақтау саласына жедел жәрдем көліктері сатып алынды.

Сонымен қатар орман шаруашылығы, ветеринария салаларына және құқық қорғау органдарына қызметтік автокөліктер берілді.

Қалалық коммуналдық қызметтерге де жан-жақты қолдау көрсетілуде. Төрт жылдың ішіндеоблыстық бюджеттен 3,1 млрд теңге бөлініп,заманауи үлгідегі 82 арнайы техника алынды.