Қармақшы ауданы тазалықта тап-тұйнақтай дағдыны қалыптастырған. Мұнтаздай таза көше, жайнаған гүлзар бақтар. Бұл – бүгінгі көрініс. Таяуда ауданда «Таза Қазақстан» экологиялық акциясы аясында «Таза аула» атты кең ауқымды сенбілік өтті.

Тазалық шарасына аудан орталығы мен барлық ауылдық округ тұрғындары, бөлім, мекеме қызметкерлері, жастар мен еріктілер белсенді түрде қатысып, туған өлкенің тазалығына өз үлестерін қосты.

Сенбілік барысында барлық елді мекендердегі аулалар тазартылып, айналасы абаттандырылып, көгалдандыру жұмыстары жүргізілді. Аймағымызда жалпы 147 аула тазартылып, көшелер, саябақтар мен қоғамдық орындар ретке келтірілді.

Сондай-ақ шара барысында ағаш көшеттері отырғызылып, әктеу, сырлау жұмыстары тұрақты түрде жүргізілді.

– Әлбетте, аймақты тазартып, өзіңнің аулаң, жұмыс істейтін ортаңды таза ұстау ісіңнің берекелі болуына әкеледі. Тазалық – әрбіріміздің парызымыз. Қоғам дамып жатқанда бір орында тұрып қалуға болмайды. Жаныңа жайлы ортада өмір сүріп, еңбек ету әлбетте жұмысқа деген ынта-ықыласыңды да арттыратыны анық, – дейді Мейрамкүл Ермекбаева.

Айта кету керек, Қызылорда облысында дәстүрлі түрде «Үлгілі елді мекен» конкурсы ұйымдастырылып, ауылдарды абаттандыру жобаларына қолдау көрсетіліп келеді. Бұл байқауда 2024 жылы аудан көлемінде Қармақшы ауылы жеңімпаз атанса, өткен жылы Қуаңдария ауылына 15 млн теңге көлеміндегі сертификат табысталған болатын.

Қармақшы ауданы әкімінің баспасөз қызметі