Қызылорда облысының Арал ауданында түйе сүтінен құрғақ ұнтақ өндірілмек. Бүгінде аталған жобаны жүзеге асырушылар негізгі өндірістік ғимараттың құрылысын аяқтап, құрал-жабдықтарды орналастырып үлгеріпті. Жоба биыл іске қосылып, 23 жаңа жұмыс орны ашылады деп күтілуде.
Зауыт құрылысына 3 млрд теңге инвестиция салынған. Оның 1,8 млрд теңгесін мемлекет қолдауы аясында жеңілдетілген несиемен салса, қалған 1,2 млрд теңгесі – кәсіпкердің жеке қаражатынан. Жоба бастамашылары «Qazaq Camel» серіктестігі өкілдерінің айтуынша, кәсіпорын жылына 392 тонна өнім шырғармақ.
– Жоба Бірыңғай индустрияландыру картасына енгізілген. Мемлекеттік қолдау аясында индустриялық аймақтан 1 гектар жер телімі бөлінді. Сонымен қатар, «Өнеркәсіпті дамыту қоры» арқылы Қытай Халық Республикасынан қажетті технологиялық жабдықтарды сатып алуға 1,8 млрд теңге қаржы қарастырылған. Өнімді өткізу бойынша оффтейк-келісімшарт жасалып, алдағы 10 жыл ішінде өнім толықтай Қытай нарығына экспортталатын болады, – дейді облыстық кәсіпкерлік және өнеркәсіп басқармасының басшысы Мөлдір Тәуіпбаева.
Жобаның аймақ үшін әлеуметтік маңызы жоғары. Өйткені, мұнда 23 жаңа жұмыс орны ашылмақ. Қазіргі таңда негізгі өндірістік ғимараттардың құрылысы аяқталып, технологиялық қондырғыларды монтаждау жұмыстары толық жүргізілді. Кәсіпорын жақын арада іске қосылады.
Елде түйе сүтін өңдеушілер бар. Әйтсе де, мұндай жоғары деңгейде құрғақ ұнтақ өндіретін кәсіпорындар аз. Сол себепті, өңірдегі бірегей бастамалардың қатарына жатады.
Жобаның тағы бір пайдасы, Арал өңірінде түйе шаруашылығын дамытуға, жергілікті тұрғындардың шикізат өткізуге мүмкіндік алуына, ауыл халқының әлеуметтік-экономикалық хал-ахуалын жақсартуға мүмкіндік береді.
– Жобаның табысты іске асуы жаңа жұмыс орындарының ашылуына, халықтың тұрақты табыс табуына, экспорттық әлеуеттің артуына, өңдеу өнеркәсібінің дамуына және бюджетке түсетін салық түсімдерінің ұлғаюына оң әсер етеді. Бұл бағыттағы жұмыстар алдағы уақытта да жүйелі түрде жалғасын табатын болады, – дейді Мөлдір Сұлтанбекқызы.
Бұған ұқсас бірегей жоба Алматы облысының Іле ауданында кездеседі. Онда арнаулы серіктестік құрғақ шұбат өндіреді. Аталған кәсіпорын айына 30 тоннаға дейін өнім шығарады. Әлбетте алдағы уақытта түрлі жобалар іске аса бермек. Ал іске асырылған әрбір жоба – ел экономикасын қуаттандыруға бағытталған күш.