Жалағаш ауданы, Таң ауылындағы №118 орта мектепте «Ы. Алтынсарин» төсбелгісінің иегері, ұлағатты ұстаз Раушан Қожагелдиеваны еске алуға арналған тағылымды шара өтті.

Онда облыстың білім саласында ұзақ жылдар абыройлы қызмет атқарып, шәкірт тәрбиелеуде елеулі із қалдырған Раушан Жарылқапқызының өмірі мен еңбегі – ұрпаққа кеңінен насихатталды.

Іс-шараға «AMANAT» партиясы Қызылорда облыстық филиалының төрағасы Жандос Базартай, Қызылорда облыстық білім басқармасының басшысы Асқарбек Есжанов және Жалағаш аудан әкімінің орынбасары Ғани Сүлейменов, ұлағатты ұстаздың әріптестері, шәкірттері және ауыл тұрғындары қатысып, жүрекжарды естеліктерімен бөлісті.

Тағылымды шара барысында орта мектеп базасынан ұстаздың құрметіне арнайы кабинет ашылып, оның өмір жолы мен еңбек жолынан сыр шертетін бұрыштар ұйымдастырылды. Сонымен қатар бастауыш сынып мұғалімдері мен оқушыларына арналған логикалық олимпиада өтті.

Рухани кеште сөз алған партияның облыстық филиалының төрағасы Жандос Базартай бұл іс-шара ұлағатты ұстаздың еңбегін ұрпаққа үлгі етумен қатар, шәкірттерін патриоттық рухта тәрбиелеген асыл жанның рухына көрсетілген шынайы құрмет екенін атап өтіп, олимпиадаға қатысушы ұстаздарды «AMANAT» партиясы атынан алғыс хатпен марапаттады.

Жалпы еске алу кеші мазмұнды да әсерлі өтіп, көпшілік көңіліне ерекше тебіреніс ұялатты.