Қазақ баласын жастайынан ұлттық құндылыққа баулып өсірген. Күнделікті өмірдегі әрбір әрекет осы бағытқа сілтейді. Бұл ұстаным әрбір азаматтың бойында болуы керек. Мәселен, мен орта мектептегі дене шынықтыру пәнінің мұғалімі ретінде шәкірттерімді ұлттық спортқа баулып өсіріп келемін.

Неліктен дейсіз бе? Өйткені, қазақтың ұлттық спортының әрбір түрі зеректікке, алғырлыққа, батылдыққа тәрбиелейді. Мәселен, қазақ күресін нықтап меңгерген бала қарсыластың айласын зерделеп, одан басым болуды көздейді. Бұл мақсатта ізденеді, талдайды. Ал арқан тартыс – адамдарды бір мақсатқа бірге қадам басуға баулитын ойын түрі. Асық болса, баланың интеллектуалдық қабілетін шыңдайды. Бала әрі мергендік қабілетін дамытады. Діттеген межеге жетуге бейім болып қалыптасады. Мұның барлығы дала пәлсапасын бойға жиған қазақтай ұлы халықтың ұстанымдарымен ұштасып жатады.

Біз мектеп бағдарламасындағы жоспарымыздан ұлттық ойынның шет қалмауын қалаймыз. Міне, мұндай бағытта еңбек етіп, өзінен кейінгі толқынның бойында ұлттық иммунитет қалыптастыру үшін адам баласы ең әуелі өзі ниетті, талапты болуы шарт. Біз осы үдеден шығуда еңбектенудеміз.

 Мүсірәлі Баяхметұлы,
№143 орта мектептің дене шынықтыру пәні мұғалімі