Сыр өңірінде халықтың қауіпсіздігі мен бостандығын қорғауды басты мақсат еткен Қызылорда облысының Полиция департаментінде 11 өзге ұлт өкілі қызмет атқарады. Олардың барлығы ел тыныштығын сақтауда абыройлы еңбек етіп, қоғам тұрақтылығына өз үлестерін қосып келеді.

Солардың қатарында ұлты шешен болса да, жүрегі қазақ деп соғатын Зелимхан Чингисханович Хасихановты ерекше атап өтуге болады.

Тәртіп пен жауапкершілікті ту еткен Зелимхан 1991 жылдың 20 сәуірінде Қызылорда облысының Жалағаш ауданында дүниеге келген. Туған жерінде білім алып, №31 орта мектепті аяқтаған.

Жастайынан әскери тәртіпке жақын болып қалыптасқан Зелимхан Ақмола облысының Щучинск қаласындағы Қазақстан Республикасы Қорғаныс министрлігінің Шоқан Уәлиханов атындағы Қарулы Күштер Кадет корпусында білім алып, әскери мамандықты игерді. Еңбек жолын әскери қызметтен бастап, Жамбыл облысы Қордай ауданындағы Гвардейский кентінде орналасқан әскери бөлімде бөлімше командирі ретінде шыңдалды.

Білімге деген ұмтылысы оны заң саласына алып келді. Шымкент қаласындағы «Фемида» колледжінде «Заңгер» мамандығын меңгеріп, кейін Қызылорда қаласындағы Ақмешіт гуманитарлық-техникалық институтында «Құқықтану» бағыты бойынша жоғары білім алды.

Ішкі істер органдарындағы қызметін 2015 жылдан бастап жалғастырып келеді. Қазіргі таңда Қызылорда ОПД Жалағаш аудандық полиция бөлімінің Жедел басқару орталығында инспектор-кезекші ретінде қызмет атқарып, ел тыныштығы мен қоғамдық қауіпсіздікті қамтамасыз ету жолында еңбек етуде.

Қызмет жолында учаскелік полиция инспекторы ретінде де еңбек етіп, тұрғындармен тығыз байланыс орнату арқылы халық сеніміне ие болды. Күнделікті жұмыс барысында әр азаматтың мәселесіне бейжай қарамай, ашық диалог пен өзара түсіністікке негізделген қарым-қатынас орната білді.

Бос уақытында спортқа ерекше көңіл бөледі. Түрлі спорттық іс-шараларға белсенді қатысып, салауатты өмір салтын ұстануды басты қағидаларының бірі санайды. Сонымен қатар отбасында үлгілі әке , жарымен бірге үш ұл тәрбиелеп отырған бақытты жанұя иесі.

– Жалағашта туып-өстім. Бала кезден тәртіпке жақын болдым. Әскери бағытты таңдадым, кейін ішкі істер саласына келдім. Бұл – менің саналы таңдауым. Қазір ел тыныштығын күзету – үлкен жауапкершілік. Қызмет барысында адамдармен дұрыс қарым-қатынас орнатып, сенімге ие болу маңызды. Сол үшін әрдайым өзімді дамытуға, адал қызмет етуге тырысамын, – дейді Зелимхан Чингисханович.

Қызмет жолында адалдық пен жауапкершілікті басты қағида еткен мұндай қызметкерлердің еңбегі – қоғам үшін аса маңызды. Түрлі этнос өкілдерінің бір мақсат жолында бірігіп, ел тыныштығын қорғауы – Қазақстандағы бірлік пен татулықтың жарқын көрінісі. Осындай азаматтардың қажырлы еңбегі қоғамдағы тұрақтылық пен қауіпсіздіктің берік негізін қалыптастыра беретіні сөзсіз.