Бүгін Жалағаш ауданының әкімі Ардақ Ибраимов Жалағаш теміржол вокзалының құрылыс жұмыстарымен танысты.

Мемлекет басшысының, Үкімет пен облыс әкімінің қолдауымен ауданда заманауи үлгідегі теміржол вокзалы қайта жаңғыртылуда.

Аудан аумағынан 47,0 шақырым темір жол өтеді. Темір жол бойында 3 станция және 3 разъезд орналасқан. Жалағаш станциясы арқылы 6 жолаушылар пойызы өтеді (Алматы-1 – Ақтөбе, Ақтөбе – Алматы-1, Алматы-2 – Маңғыстау, Маңғыстау – Алматы-2, Қызылорда – Павлодар, Павлодар – Қызылорда).

Бүгінде теміржол вокзалы ғимаратының құрылыс жұмыстары басталды. Қазіргі уақытта ескі нысанды бұзу (демонтаж), жаңа ғимараттың іргетасын қалау жұмыстары жүргізілуде.

Жоба аясында жаңа үлгідегі вокзал ғимараты, перронды абаттандыру және жарықтандыру жұмыстары қарастырылған. Құрылыс жұмыстарын желтоқсан айына дейін аяқтау жоспарланып отыр.

Аудан әкімі құрылыс жұмыстарының сапалы әрі белгіленген мерзімде аяқталуын, сондай-ақ жолаушыларға жайлы әрі заманауи талаптарға сай келетін вокзал ғимаратын ел игілігіне уақытылы пайдалануға беруді тапсырды.