Мүмкіндігі шектеулі жандардың мүмкіндігін шектемеуіміз керек. Тағдырдан таяқ жегенмен, олардың алдында кесе көлденең кедергі болмағаны жөн. Бүгінде инклюзивті саясатты іске асырудың жай-жапсары мінберден түспей тұр. Бүгін Қармақшы ауданының әкімі Жандос Еркінбек те жиында осы түйткілді тілге тиек етті.

– Инклюзивті саясатты іске асыру – ауданымыз үшін де, жалпы қоғам үшін де маңызды әрі өзекті мәселелердің бірі. Өйткені әрбір азамат – қоғамымыздың толыққанды мүшесі және олардың құқықтары сақталып, қажеттіліктері қамтамасыз етілуі тиіс. Біздің міндетіміз – ауданымыздағы ерекшелігі бар азаматтарға қолдау көрсетіп, кедергісіз орта қалыптастыру, – деді Қармақшы ауданының әкімі.

Ерекше азаматтарға көрсетілетін «Инватакси» қызметінің сапасы әрдайым назарда. Биыл аудан бойынша бұл қызметке жергілікті бюджеттен тиісті қаржы қаралып, қазіргі таңда 7 арнайы көлік қызмет көрсетуде. Аудан әкімі аудандық жұмыспен қамту және әлеуметтік бағдарламалар бөлімінің басшысына ешқандай кемшіліктер орын алмауын және бұл бағыттағы жұмыстарды жүйелеу тапсырылды.

Күн тәртібіндегі келесі мәселе – санитарлық тазалық пен абаттандыру жұмыстары. Жандос Еркінбек саланың тұрақты бақылауда екенін атап өтті.

– Тазалық жұмыстарының сапалы ұйымдастырылуына барша аудан азаматтарының атсалысуы өте маңызды, – деген Жандос Еркінбек тиісті сала басшыларына бұл жұмысты сапалы ұйымдастыру керегін тапсырды.

Сондай-ақ Конго-Қырым геморрагиялық қызбасының алдын алу шаралары да қаралып, мәселе жан-жақты талқыланды. Жиында көтерілген барлық салалар бойынша жауапты бөлімдерге бірқатар тапсырмалар жүктеліп, олардың орындалуын қатаң бақылауда ұстау тапсырылды.

 Қармақшы ауданы әкімінің баспасөз қызметі