Облыс орталығымен іргелес жатқан Тасбөгет кентінің келбеті көз тартарлықтай өзгерді. Жаңарған жолдар тұрғындардың қуанышына айналған. Талай жылдан бері Тасбөгеттің түлегенін көргендер бұл жетістікті ауыз толтырып айтып жүр. Кентте бұл күнде тазалық жұмыстары да қарқынды жүруде. Қолда барды ұқсатып, айналасын гүлдендіріп, жасыл-желекке де айналдырып келеді.
Жыл басынан бері кентте «Таза Қазақстан» экологиялық акциясы аясында санитарлық тазарту, көркейту және көгалдандыру іс-шараларын жүргізу өз жалғасын тауып келеді. Акцияның негізгі мақсаты – қоршаған ортаны қорғау, елді мекендердің санитарлық жағдайын жақсарту және тұрғындардың экологиялық мәдениетін қалыптастыру болып табылады. Аталған акцияға меншік нысанына қарамастан барлық мекеме, ұйым, кәсіпкерлер мен тұрғындар жұмылдырылуда.
– Бүгінгі таңда Тасбөгет кенті, кентке қарасты Сабалақ саяжайы және Иіркөл елді мекенін қоса алғандағы халықтың саны 29 мың 145 адамға жетті. 5 мыңнан аса түтін бар. Жыл сайын ауқымы кеңейіп, айналасы бір жылдың ішінде адам танымастай өзгерді. Енді осынша кең ауқымды таза ұстап, одан сайын келбетін арттыруда аянбай еңбек етіп келеміз. Әрине, бұл үлкен күшті қажет етеді. Десек те, Тасбөгеттің тазалығы көш ілгері екенін мойындауымыз керек, – дейді кент әкімі Айдын Тныштықбай.
Жыл басында мердігер «ИП Аманова» мекемесімен келісім-шарт жасалып, кент көшелеріндегі тұрмыстық қалдықтарды жинап Қызылорда қаласындағы арнайы полигонға жеткізілуде. Айдын Маратұлы осындай ауқымды жұмыстардың орындалуына тұрақты өткізілетін сенбіліктер мен «Таза Қазақстан» республикалық экологиялық акциясының зор маңыз атқаратынын айтты.
– Тасбөгет кенті әкімі аппаратының ұйымдастыруымен «Таза Қазақстан» акциясы аясында кенттегі орталық бейіттің айналысын қоқыстардан тазартып, шөптерін шабу жұмыстары жүргізілді. Сондай ақ, Тасбөгет кенті әкімінің футболдан ауыспалы кубогі аясында жастардан құралған топтармен каналдардын жиегіндегі қоқыстардан тазалау акциясы ұйымдастырылды. «Таза Қазақстан» экологиялық акциясы барысында әрбір сенбі сайын сенбіліктер ұйымдастырылып, кент көшелері, тағзым алаңы, әлеуметтік және кәсіпкерлік нысандар ғимараттары тұрмыстық қоқыстардан тазартылып, шөптері шабылды. «Таза Қазақстан» тек қала тазалығының ғана емес, сана тазалығының да қалыптасуына ерекше серпін берді. Алдағы уақытта да акция өз жалғасын табары сөзсіз. Біз таза қала үшін еңбектенеміз, – дейді Айдын Маратұлы.
Тасбөгет кенті әкімі аппаратының үнемделген қаржы есебінен мердігер мекеме анықталып, кенттегі электр желісіне кедергі келтіріп тұрған талдарды кесу жұмыстары жүргізілуде. Талды да түбімен қопарып тастамай, тек кедергі келтіріп тұрған тұстары кесіліп жатыр. Айналаны жасыл-желекпен көмкеріп, кенттің қоқыстан таза болғаны – әрбіріміздің жауапкершілігіміз. Тасбөгеттіктер де мұны жақсы түсінген. Әлбетте, тазалық талабын сақтамайтындар да бар. Заң аясында олар да жауапкершілігін түсінуде.
– «Таза Қазақстан» акциясы барысында санитарлық тазалық нормаларының, құрылыс талаптарының сақталуы бойынша жүргізілген рейдтік шаралар нәтижесімен заң бұзушылықтарға жол берген 12 тұрғынға айыппұл салынып, 16 тұрғынға әкімшілік құқық бұзушылық туралы хаттама «ескерту» берілді. Сонымен қатар, кенттің сәулет құрылысын қалыптастыру мақсатында жеке кәсіпкер есебінен кенттің кіре берісіне замануи мешіт бой көтеріп, ел игілігіне пайдалануға берілді. Мұның барлығы елдің жарқын болашаққа бет алып, елдік мүддені ойлайтынынан жасалып жатқан тірлік, – дейді кент әкімі.
Тасбөгет кенті аумағында қоғамдық көлік қатынайтын бірқатар көшелерге, атап айтсақ, Абай Құнанбаев, Мұстафа Шоқай, Сапарбай Олжабайұлы, Қалқабай Әбенов көшелеріне орташа жөндеу жұмыстары жүргізілді. Қазіргі таңда, аймақ басшысының қолауымен кенттегі Амангелді Иманов, Шахмардан Есенов, Сәбира Майқанова және Е.Бозғұлов көшелеріне қайта жаңғырту жұмыстары жүргізілуде. Осы көшелердің ішінде Шахмардан Есенов көшесі екі жолақтан төрт жолаққа ауысты.
– Кент көшелеріне ағымдағы жол жөндеу жұмыстарын жүргізу үшін қалалық бюджеттен қаржы қаралып, қазіргі уақытта тиісті жол жөндеу жұмыстары аяқталды. Кенттегі электр желісіне және жол белгілеріне кедергі келтіріп тұрған қураған талдарды кесу үшін қаржы қаралып, тиісті жұмыстар жүргізілуде. Кент көшелеріне жаңа жол белгілері мен жасанды жол кедергілерін орнату мақсатында үнемделген қаржы бөлініп, жоба аясында 107 дана жол белгісі және Тасбөгет кентіндегі көлік қозғалысы қарқынды, әлеуметтік нысандар орналасқан көшелерге 5 дана жасанды жол кедергісі орнатылды, – дейді қыруар жұмысты таныстырған кент әкімі.
Кент тұрғындарына қолайлы жағдай жасау мақсатында Тасбөгет кенті әкімі аппаратының үнемделген қаржы есебінен кенттегі А. Жалгелдин (Ш. Есенов және Сапарбаев көшелері аралығы) және Т. Жүнісов көшелеріне жарық бағаналары орнатылды. Қазіргі таңда кент толық жарық бағаналарымен қамтылды.
Түйін.
Түнгі жарығы жаныңа шабыт сыйлап, көз алдыңда ғажайып көріністер қалыптастыратын кенттің бүгінгі жағдайында да тазалықтың тап-тұйнақтай болып, кенттің ажарын кіргізіп тұрғанын аңғартады. Күндіз-түнгі тынбай жасалған еңбектің нәтижесі екені даусыз. Жаңарған Тасбөгеттің бүгінгі ажарында да, атқарылған әрбір істің «қыздың жиған жүгіндей» болып, жинақы көрінгенінен де үлкен еңбекті байқау қиын емес.
