Белгілі продюсер Баян Мақсатқызы бұрынғы жары Бақытбек Есентаевпен арадағы ауыр кезеңдерді еске алып, отбасылық зорлық-зомбылық мәселесіне қатысты маңызды пікір білдірді, деп хабарлайды qyrdan.kz

Ол алғашқы некесінде өткен қиындықтар туралы айта келе, «зорлық бір рет болса, оның қайта қайталану қаупі өте жоғары» екенін атап өтті.

«Алғаш рет қол көтерген кезде мен киімдерімді жинап, бірден ата-анамның үйіне кеттім. Әкем мен анам ештеңе сұрамады, үндемей қабылдады. Маған ең ауыр тигені – ешкімнің “шыда” демегені», – деді Баян Мақсатқызы.

Продюсер қазақ қоғамындағы «шыда» деген түсінікті ең зиянды стереотиптердің бірі деп сынға алды. «Бұл — мен ең жек көретін сөз. Неге әйел шыдауы керек? Неге зорлық-зомбылыққа төзіп отыруы тиіс?» – деп ашына айтты ол.

Сондай-ақ Баян Мақсатқызы өмірінде шешуші рөл атқарған анасының ақылын да еске алды.

«Анам әрдайым: “Ер адам бір рет қол көтерсе, тағы қайталайды” деп айтатын. Сол үшін мен кешірмедім, өз жолымды таңдадым», – деді продюсер.