2026 жылғы 23 тамызда Қазақстан Республикасында Құрылтай депутаттарының сайлауы өтеді. Бұл – еліміздің қоғамдық-саяси өміріндегі маңызды оқиғалардың бірі әрі азаматтардың ел дамуына тікелей қатысуына мүмкіндік беретін жауапты саяси науқан.

Құрылтай – қоғам мен мемлекеттің өзара ықпалдастығын нығайтатын, елдің ұзақ мерзімді даму бағыттарын айқындауға және маңызды стратегиялық шешімдердің қабылдануына атсалысатын өкілді институт. Сондықтан Құрылтай депутаттарын сайлау – елдің ертеңіне бейжай қарамайтын әрбір азамат үшін маңызды таңдау.

Сайлау – демократиялық қоғамның басты құндылықтарының бірі. Ол халықтың еркін білдіруге, мемлекеттік басқару ісіне қатысуға және қоғамдағы оң өзгерістерге үлес қосуға мүмкіндік береді. Әрбір азаматтың дауысы еліміздің тұрақты дамуы мен болашақтағы бағытын айқындауда маңызды рөл атқарады.

Қазақстан Республикасының Конституциясында әрбір азаматтың сайлауға қатысу құқығы айқын белгіленген. Осы құқықты жүзеге асыру – тек заңмен берілген мүмкіндік қана емес, сонымен бірге ел тағдырына деген азаматтық жауапкершіліктің көрінісі.

Сайлау науқанының ашықтық, заңдылық және әділдік қағидаттарына сай ұйымдастырылуы – мемлекетіміздің демократиялық даму жолындағы маңызды басымдықтарының бірі. Сондықтан әрбір сайлаушының өз таңдауын еркін әрі саналы түрде жасауына барлық қажетті жағдай қамтамасыз етіледі.

Құрылтай депутаттарын сайлау – Қазақстанның болашағын бірге қалыптастыруға бағытталған маңызды қадам. Елдің қоғамдық-саяси дамуына бейжай қарамайтын әрбір азаматтың белсенділігі – мемлекетіміздің өркендеуіне қосылған нақты үлес.

Құрметті жерлестер!

23 тамыз күні сайлау учаскесіне келіп, азаматтық ұстанымыңызды білдіріңіз. Әрбір дауыс – ел болашағы үшін маңызды. Бірлігіміз бен белсенділігіміз Қазақстанның тұрақты дамуы мен жарқын келешегінің берік негізі болмақ.