Мемлекеттік қызметте бетегеден биік, жусаннан аласа қарапайым, әйтсе де маңдай терін сылып ала еңбектенетін сала бар. Ол — қоғамдық даму саласы. Араласпайтын саласы, біте қайнаспайтын қызметі жоқ. Қоғамдық-саяси ахуалдың төңірегіндегі түймедей мәселеге де жауапты. Бүгін Қармақшы аудандық қоғамдық даму бөлімінің басшысы Нұржан Шапи аталған саладағы қыруар жұмыспен бөлісті.
— Аудандағы қоғамдық-саяси ахуал тұрақты, ең бастысы – халықпен кері байланыс орнатуға басымдық беріліп отыр. Аудан әкімдігі мен бөлімдердің Facebook, Instagram, TikTok әлеуметтік желілеріндегі парақшалары арқылы тұрғындарға қажетті ақпараттар тұрақты жарияланып келеді. Сонымен қатар, кент және ауылдық округ әкімдері де өз аумақтарындағы жұмыстарды ашық көрсетіп, халықпен байланыс орнатуда.
Биыл ауданның барлық дербес бөлімдері мен кент, ауылдық округ әкімдері БАҚ өкілдері мен қоғам белсенділері алдында есеп беріп, тұрғындардың сұрақтары мен ұсыныстарына жауап берген. Бұл – атқарылып жатқан жұмыстарды халыққа ашық жеткізудің маңызды тетігі деп ойлаймын, — деді Нұржан Арыстанұлы.
Қармақшыда әлеуметтік жобаларға да ерекше көңіл бөлінуде. 2026 жылы мемлекеттік әлеуметтік тапсырыс аясында 8 жоба жүзеге асырылып, қоғамдық-саяси тұрақтылық, діни ағарту, құқықтық мәдениет, сыбайлас жемқорлықтың алдын алу, жастардың бос уақытын тиімді ұйымдастыру, жасанды интеллект пен еңбекке баулу және ардагерлерді қолдау бағыттары қамтылған.
— Діни ахуал бойынша да жағдай тұрақты. Жыл басынан бері ұлттық және рухани құндылықтарды дәріптеу, радикалды идеологияның алдын алу және дәстүрлі діннің маңызын түсіндіру бағытында 225 іс-шара өткізілді. Ауданда көрнекі ақпарат құралдарын жаңарту жұмыстары да жүргізілуде. Бүгінде барлық кент және ауылдық округтерде 208 билборд орналастырылып, оның 147-сі жаңартылған. Мемлекеттік рәміздерді жаңарту үшін биыл аудандық бюджеттен 2 млн 450 мың теңге бөлініп, жаңа тулар сатып алынды, — деді бөлім басшысы.
