Терроризм – адам өмірін құрметтемейтін, қоғамға қорқыныш пен қайғы әкелетін қылмыс. Оның салдарынан көптеген жазықсыз адамдар зардап шегіп келеді. Терроризмнің құрбандары олар – өз арманы, отбасы, болашағы бар қарапайым адамдар.

Мұхтар – ауылдан қалаға оқуға келген студент. Ол білім алып, жақсы маман болып, ата-анасына көмектесуді армандайды. Қалада жүргенде ол жаңа адамдармен танысып, олардың арасында өзін дінге жақын, «шын жолды көрсетеміз» деп таныстырған топ мүшелері болады. Алғашында олар Мұхтарға дін туралы әңгімелер айтып, өздерін өте дұрыс, адал адамдар ретінде көрсетеді.

Уақыт өте келе олар Мұхтардың санасына радикалды ойларды сіңіре бастайды. Басқа адамдардың бәрі «қате жолда» деп түсіндіріп, қоғамнан бөлектенуге шақырады. Мұхтар біртіндеп достарынан, отбасынан алыстап, тек сол топтың айтқанын дұрыс деп қабылдай бастайды. Оның ойы өзгеріп, бұрынғы өмірі мен армандары ұмытыла бастайды.

Бір күні ол сол топтың ықпалымен заңсыз әрекеттерге араласып кетеді. Соның салдарынан Мұхтар ұсталып, өз болашағынан, оқуынан, қалыпты өмірінен айырылады. Ал оның ата-анасы мен туыстары үлкен қайғыға ұшырап, қоғам алдында ауыр жағдайға қалады.

Бұл мысал діни терроризмнің қалай пайда болатынын және оның құрбаны кім болатынын көрсетеді. Көп жағдайда құрбандар – дінді толық түсінбейтін, өмірлік тәжірибесі аз жастар. Олар радикалды топтардың алдауына түсіп, өз болашағын құрбан етеді.

Оның құрбандары – Мұхтар сияқты жастар, олардың отбасылары және жалпы қоғам. Сондықтан дұрыс діни білім беру, жастарды тәрбиелеу және экстремизмге қарсы түсіндіру жұмыстары өте маңызды.

Балауса Сыздықова,
Қызылорда облысы дін істері басқармасы
 «Дін мәселелерін зерттеу орталығының»
журналист маманы