Тіл – ұлттың жаны, халықтың рухани тірегі, ата-бабадан аманат болып жеткен ең асыл мұра. Әр халықтың болмыс-бітімі, дүниетанымы, салт-дәстүрі мен мәдениеті оның тілінде сақталады. Сондықтан тіл – тек қарым-қатынас құралы ғана емес, ұлттың тұтастығын айқындайтын қасиетті құндылық.

Қазақ халқы үшін ана тілі – ғасырлар бойы қалыптасқан рухани байлықтың қайнар көзі. Батырлар жыры, шешендік сөздер, мақал-мәтелдер мен нақылдар – барлығы да ұрпақ санасына тіл арқылы сіңеді. Тіл арқылы біз өткенімізді танимыз, бүгінімізді бағалаймыз, болашағымызды айқындаймыз. Ана тілін құрметтеу – ата-бабаны құрметтеу, елдікті сақтау деген сөз.

Тілдің дамуы – мемлекеттің дамуы. Тілі жоғалған халықтың өзі де жоғалады деген сөз бекер айтылмаған. Сондықтан мемлекеттік тілді білу, оны күнделікті өмірде қолдану – әр азаматтың парызы. Әсіресе жас ұрпақтың ана тілінде сауатты сөйлеп, дұрыс жаза білуі – ел болашағының кепілі.

Қазіргі жаһандану дәуірінде бірнеше тіл білу заман талабы болғанымен, өз ана тілімізді ұмытпау – басты міндет. Өзге тілді меңгеру – білім мен мүмкіндіктің кілті болса, ана тілі – ұлттық болмыстың алтын діңгегі.

Халықтың тәуелсіздігінің ең басты белгісі – оның ана тілі, ұлттық мәдениеті жоқ ел ешқашанда егеменді ел бола алмайды, болуы мүмкін емес. Қазақ тілінің тағдыры үшін күрес соңғы жүз жылда бірде-бір толас тапқан жоқ. Ұлы Абайдың заманын айтпағанда, Әлихан Бөкейханов, Ахмет Байтұрсыновтар бастаған алып топ тіл мәселесіне ерекше мән беріп, оның шексіз байлығын, суреткерлік қуатын, бейнелігімен саздылығын көркемдік сапаға жеткізді. Бүгінгі таңда мемлекеттік тілді білу – мемлекеттік қызметкерлердің ең басты біліктілік талабына айнала бастады.

Қазіргі ең таза ең бай, ең табиғи және бұзылмай, бұрынғы қалпында сақталып қалған бір тіл болса, ол қазақ тілі. Бүгінгі күні Тіл — мемлекеттің тұғырлы тірегі, халықтың рухани байлығы, өткені мен болашағының айқын көрінісі. Ана тілінің қадір-қасиетін біле білген азамат оны ұлттың рухына, қазына байлығына балайды.

Қорытындылай келе, тіл – ең асыл құндылық. Оны сақтау, дамыту және құрметтеу – баршамыздың ортақ міндетіміз. Ана тіліміз мәңгі жасай берсін, ұрпақтан-ұрпаққа аманат болып жетсін!

Н.Райкулова,
Қызылорда қалалық сотының бас
маман-сот отырысының хатшысы