Қызылорда облысы бойынша сауда және тұтынушылардың құқықтарын қорғау департаменті бар. Департамент басшысының міндетін атқарушы Нұрлыбек Бимырзаев таяуда журналистермен жүздесті. Айтуынша, сауда саласын қатаң бақылап отыр, тіпті азық-түлік тауарларының маңызды түрлерінің бағасын сәт сайын бақылап отыр. «Ет бағасы неге өсті?» деп сұрадық біз департамент басшылығынан.

Есепті кезеңде Қызылорда облысы бойынша сауда және тұтынушылардың құқықтарын қорғау департаментіне 910-ға жуық азаматтан өтініш түскен. Өтініштер заң талаптарына сәйкес қаралып, бақылау және тексеру шаралары жүргізілген. Нәтижесінде сауда және тұтынушылардың құқықтарын қорғау саласында бірқатар заң бұзушылықтар анықталып, тиісті шаралар қабылданыпты. Жиында сөз алып сауал қойдық. Ет бағасының өсіп жатқанынан хабары бар ма екенін сұрадық.

– Арнайы комиссия бар. Оның құрамында облыс әкімінің орынбасарынан бастап, «СПК-Байқоңыр» мекемесінен, облыстық ауыл шаруашылығы басқармасынан, тағы біраз мекемелерден өкілдер бекітілген. Етті өнім өндірушіден бастап, сөреге дейін зерттейміз. Егер үстеме ақы 15 пайыздан асып кетсе, біз айыппұл саламыз, шара көреміз, – деді Нұрлыбек Шонжарұлы.

Әйтсе де, Бимырзаев мырза ет бағасының неге өсетініне анализ жасауда ет өндірушіге дейінгі қатарды да алу керек еді… Өйткені, себебін біз айтайық… Бір апта көлемінде Қызылордада күріш жемі тапшы. Кәдімгі ақ күріштен алда жүретін Қызылордада осындай жағдай болып тұр. Күріш өңдеу зауыттары ресми мәлімет беруден бас тартты. Бірақ бейресми дерек көздеріне сүйенсек, ақ күріш қоймаларда лық тола. Нарыққа төтеп беріп, өтпей жатыр. Сәйкесінше, күріш ақтау уақытша тоқтайды. Жем де өндірілмейді. Қолда бар күріш жемін сауда нүктелерінен келісіне 80 теңгеден алып келген шаруалар енді 100 теңгеден алуға мәжбүр.

– Қазір біз келісін 100 теңгеден алып жүрміз. Бұл бағамен тоқтауына да кепілдік жоқ. Ал бағымға кірген төрт түлік енді сәуір айында союға жарайды. Сәуір айында ет қымбаттамаса, онда барлығымыз шығынға белшеден баттық деген сөз, – дейді шаруалар.

Мәселенің себебі мен салдарын іздемей, оның шешімін айту қиын. Сауда және тұтынушылардың құқықтарын қорғау департаменті басшысы «ет өндірушіден сөреге дейін ғана зерттейміз, ет өндірушіден әрі күріш зауыттарын зерттеу құзыретімізге кірмейді. Тіпті халық келіп, шағым түсірсе де бұл мәселені қарай алмаймыз» деп қадап айтты.

Дәулет ҚЫРДАН