Адам баласына берілген ең үлкен сый – өмір. Ал сол өмірдің сапалы әрі мәнді болуы әркімнің өз қолында. Бүгінгі таңда қоғамның дертіне айналған есірткі мәселесі – жас ұрпақтың жарқын болашағына төнген үлкен қатер. Есірткіге тәуелділік тек денсаулықты құртып қоймайды, ол адамның ар-намысын, мақсат-мүддесін және ертеңгі күнге деген үмітін ұрлайды.

Қазіргі жастар – еліміздің ертеңі, мемлекетіміздің қозғаушы күші. Сондықтан әрбір жасөспірім «ақ өлімнің» алдамшы екенін, бір сәттік ләззаттың арты өмірлік қасіретке әкелетінін терең түсінуі тиіс. Біздің басты мақсатымыз – есірткіге қарсы берік иммунитет қалыптастыру. Нағыз еркіндік есірткі тұтынуда емес, керісінше, оған батыл түрде «жоқ» деп айта алуда.

Саналы адам ешқашан өз болашағын бұлыңғыр затқа айырбастамайды. Біз есірткісіз, қауіпсіз ортаны бірге құруымыз керек. Спортпен шұғылданып, шығармашылықпен айналысу өте маңызды. Есіңде болсын: сенің бүгінгі дұрыс таңдауың – бүкіл ұлттың саулығы мен еліміздің гүлденуінің кепілі. Өміріңді бағала, саналы таңдау жаса!

«Дені саудың – жаны сау» демекші, достар, жат әдеттен аулақ болып, салауатты болашақты бүгіннен бастап қалыптастырайық!

 #есірткігеқарсы
 Кәусар Ғалымжан,
№266 мектеп-лицей
Қазалы ауданы