Тәуелсіздік – біздің ең қастерлі құндылығымыз, ал сол азаттықтың тірегі – білімді де саналы жастар. Алайда, бүгінгі таңда ұлт болашағына қауіп төндіріп тұрған қатерлі індеттің бірі – есірткіге тәуелділік. «Ақ өлім» атанған бұл кесел адамның ерік-жігерін құм қылып, денсаулығын тоздырып, арман-мақсаттарын күлге айналдырады.

Қазіргі қоғамда синтетикалық есірткілердің белең алуы жастар арасында алаңдаушылық туғызуда. «Бір рет көруден ештеңе етпейді» деген алдамшы ой – тұңғиыққа бастар алғашқы қадам. Есірткіге тәуелділік тек бір адамның қасіреті емес, ол – отбасының ортаюы, ұлттық қауіпсіздікке нұқсан келуі. Нағыз еркіндік – зиянды әдеттердің құлы болу емес, керісінше, олардан биік тұрып, салауатты өмір салтын таңдау.

Еліміздің ертеңі – бүгінгі жастардың қолында. Сондықтан әрбір жас буын өзінің бос уақытын спортқа, өнерге, ғылым мен білімге арнауы тиіс. Біз есірткіден ада, рухы биік, тән саулығы мықты ұрпақ тәрбиелегенде ғана Мәңгілік ел мұраттарына жетеміз. Есірткіге «жоқ» деп айту арқылы жарқын болашақты таңдаймыз. Тәуелсіз елдің еркін ұланы болғың келсе, жат ағым мен жаман әдеттен сақтан!

#есірткігеқарсы
#противнаркотиков

Асылназ Аңсаева,
№266 мектеп-лицей оқушысы
Қазалы ауданы