Қызылорда облысының Арал ауданында жыл басынан бері 3,5 млрд теңгенің ауыл шаруашылық өнімі өндірілді. Бүгін өңірлік коммуникациялар қызметіндегі брифингте аудан әкімі Аманжол Оңғарбаев алты айдың қорытындысымен бөлісті.

– Алты айдағы ауыл шаруашылығы өнімін өндірудегі өсім 101,8 пайызға жетті. Мал басы 250 мың басқа жақындады. Сондай-ақ, тауарлы балық өсіру шаруашылығын дамыту – басты міндеттердің бірі. Қазір бұл іспен ауданда 16 шаруашылық жұмыс істейді. Оның 7-еуі көл тауарлы балық өсіру шаруашылығы болса, 8-і тоған және біреуі тұйық жүйелі сумен қамтамасыз ету құрылғылары арқылы балық өсіру шаруашылығы. Жыл соңына дейін тағы 2 тоған шаруашылығын іске қосу жоспарда тұр, – деді Аманжол Оңғарбаев.

Бүгінде ауданда жылдық қуаттылығы 23 900 тонна болатын 9 балық өңдеу зауыты жұмыс істейді. Оның екеуінде Еуропа нарығына шығатын «Еврокод» белгісі бар. Мұнан бөлек, 15-ке жуық балықты сұрыптап атыру және сақтау цехтары бар.

Ауданда 2025-2026 жылдардың мал қыстату науқанына 181,5 мың тонна мал азығын дайындау жоспарланған. Бүгінде өткен жылдан қалдық шөпті қосқанда 3865 тонна шөп, 529 тонна жоңышқа дайындалды.

Ауданға қарасты Қарақұм, Сазды, Аққұм, Жіңішкеқұм және Қосаман ауылдық округтерінде жайылымдық және шабындық жерлерге алдымен киік зиян келтірсе, кейін жаппай шегіртке басып, мал шаруашылығына айтарлықтай қиындық келтірді. Біз қазіргі таңда осы жағдайлардың салдарымен күресіп жатырмыз, – деді аудан әкімі.

Дәулет ҚЫРДАН