Елде 8 мыңнан астам мектепке 380 мыңнан астам бала алғаш рет білім әлеміне қадамын бастады. Дереккөзге сүйенсек, бірінші сыныпқа барған балалардың көшін Түркістан облысы бастап тұр. Мұнда 50 мыңнан астам бала алғаш рет қолына қалам ұстап, әріп жазады. Екінші орында 35 мыңнан астам баламен Алматы облысы, онан кейін 33 мың шәкіртпен Астана қаласы орналасқан. Алматы қаласы 31 мыңнан астам баламен төртінші орынға табан тіресе, 29 мыңнан астам бала мектеп табалдырығын аттаған Шымкент алғашқы бестікті түйіндеп тұр.
Елде білім саласына жіті назар аударылған. Жыл сайын заманауи үлгідегі жаңа білім ошақтары бой көтеріп, балалардың сапалы білім алуына барлық жағдай жасалып келеді. Биылғы оқу жылындағы мектептер саны да өткен жылғыдан 1,6 пайызға көп. Көнерген, апатты мектептердің орнын көргенде көз сүйсінетін жаңа білім ошақтары басты. Сандық мәліметке жүгінсек, 2020 жылдан бастап Қазақстанда 1200-ден астам мектеп салынған. Ел бойынша үш ауысымда жұмыс істейтін мектептердің саны да төрт есеге азайыпты. Ал биылғы оқу жылында Түркістан мен Атырау облысында әрқайсысында бес мектептен пайдалануға берілсе, Ақтөбе, Алматы және Қарағанды облыстарында үш мектептен, Жамбыл облысында, сондай-ақ Алматы және Шымкент қалаларында екі мектептен пайдалануға берілді. Ал жер кіндігі – Байқоңыр қаласында білім күні қарсаңында қазақстандық стандартқа көшкен мектеп алғаш рет шәкірттерін қабылдады.
«Байқоңыр» кешені жөніндегі Қазақстан-Ресей үкіметаралық комиссиясының бірлескен шешіміне сәйкес, Байқоңыр қаласындағы бұрынғы М.К. Янгель атындағы №7 мектептің ғимараты қала әкімшілігінің жалға беру қорынан шығарылып, толықтай Қазақстан Республикасының білім беру стандарттарына көшірілді.
Бүгінде білім ұйымы Қазақстан Республикасының коммуналдық меншігіне өтіп, №298 орта мектеп атауын иеленді. Жаңа оқу жылы қарсаңында мектеп халық игілігіне пайдалануға берілді.
Мектептің ашылу рәсіміне Қазақстан Республикасы Президентінің Байқоңыр кешеніндегі арнаулы өкілінің қызметін қамтамасыз ету бөлімінің басшысы Жан Шайхысламов, Қармақшы ауданы бойынша білім бөлімінің басшысы Берік Жәнібеков, аудандық мәслихат депутаттары мен сала ардагерлері қатысып, жаңа білім ордасының жұмысымен танысты.
Аталған білім ошағының жобалық қуаты – 790 орын. Ғимараттың жалпы аумағы 6908,37 шаршы метрді құрайды. Жаңа оқу жылына дайындық аясында қажетті жөндеу жұмыстары жүргізіліп, материалдық-техникалық базасы жаңартылды.
Сонымен қатар, кадрлық қамтамасыз ету, оқушыларды қабылдау және оқу-тәрбие үдерісін ұйымдастыру жұмыстары толық аяқталып, мектеп жаңа оқу жылында өз жұмысын бастады.
Бұл бастама – Байқоңыр қаласындағы балалардың қазақстандық білім беру жүйесі аясында сапалы білім алуына бағытталған маңызды қадам.
Оқу-ағарту министрлігінің мәліметінше, 2026-2027 оқу жылында Қазақстанда тағы 101 жаңа мектеп салынады. Жаңа білім беру нысандары жалпы 59,3 мың оқушыға есептелген. Мектеп құрылысы арнайы мемлекеттік қор, білім беру инфрақұрылымын қолдау қоры, жергілікті бюджет және жеке инвестициялар есебінен қаржыландырылады.
