Бүгін Қызылорда облысының Полиция департаментінде Ардагерлер ұйымы жанындағы Тәлімгерлер кеңесінің мүшелері патрульдік полиция батальонының жеке құрамымен және жаңадан тағайындалған қызметкерлермен таңғы саптық жиынға қатысты.
Сонан соң тәлімгерлер полицейлермен бірге қызметке шығып, оларға тәжірибелік қолдау көрсетті. Мұндағы мақсат — жас полиция қызметкерлеріне кәсіби бағыт-бағдар беру, қызметтік тәртіпті нығайту, заң талаптарын сақтау және моральдық-этикалық нормалардың сақталуына ықпал ету.
Кеңес мүшелері – ішкі істер органдарының құрметті ардагерлері жас мамандармен тәжірибелерімен бөлісіп, құқық қорғау қызметінің жауапкершілігі мен маңыздылығын түсіндірді. Сонымен қатар олар қызмет барысында азаматтармен қарым-қатынас мәдениетін сақтау, кәсіби әдеп қағидаларын ұстану және халық сенімін арттыру бағытындағы ұсыныстарын жеткізді.
Кездесу барысында сөз алған тәлімгерлер сыбайлас жемқорлықтың алдын алу, заңдылық пен тәртіпті нығайту бағытында жүзеге асырылып жатқан «Заң мен тәртіп» және «Адал полицей» қағидаттарының маңыздылығына ерекше тоқталды. Олар әрбір полиция қызметкері өз қызметінде адалдық, әділдік және жауапкершілік қағидаттарын басшылыққа алуы тиіс екенін атап өтті.
Мұндай кездесулер жас қызметкерлердің кәсіби қалыптасуына оң әсер етіп, олардың қызметтік міндеттерін сапалы әрі адал атқаруына ықпал етеді.