«Ауыл аманаты» жобасы аясында кәсібін кеңейтіп, дамудың даңғыл жолына шыққандар көп. Солардың қатарында Сырдария ауданы бойынша 2023-2025 жылдар аралығында 53 жоба қаржыландырылған.

Аталған жобалар бойынша 545,9 млн теңге қаржы берілді. Мұнан бөлек, 11 ауыл шаруашылығы өндірістік кооперативі құрылып, 71 жұмыс орны ашылған.

– Өткен жылдың желтоқсан айынан бастап бүгінгі күнге дейін «Ауыл аманаты» бағдарламасы бойынша 486,5 млн теңгеге 63 жоба ұсынылды. Оның ішінде, 36 жоба несие комитетінің отырысында  қаралып, 25 жоба мақұлданды. Бұл 25 жобаның құны – 164,3 млн теңге, – дейді Сырдария аудандық ауыл шаруашылығы және жер қатынастары бөлімінің басшысы Бағлан Мейрамбекұлы.

Қолдау тапқан жобалардың үшеуі өңдеу саласына қатысты. Қаржысы 11,4 млн теңге деп белгіленген. Сонымен қатар, 21,2 млн теңге тұратын 4 жоба омарта шаруашылығына бағытталған. Қазақтың атакәсібі – мал шаруашылығы бағытында 68,3 млн теңге тұратын 8 жоба ұсынылған. Үш жоба техника алу мақсатында 32,4 млн теңге сұраса, қалған 31 млн теңге тұратын 7 жоба басқа бағыттардағы кәсіптерді қамтиды.

Сонымен қатар, Сырдария ауданы бойынша алдағы уақытта 225,5 млн теңгеге қаралатын 27 жоба бар.

Бағдарлама нәтижесін көріп отырғандар жетерлік. Олардың әрбірі кәсібін дамыту арқылы ел игілігіне еңбек етіп отыр.

Дәулет ҚЫРДАН