Қызылорданы гүлмен көмкеріп, жасыл аймаққа айналдыруда тер төгіп жүрген «Kazstroycapital LTD Kyzylorda» мекемесінің мамандары бір жылда 9 мыңнан аса ағаш егеді. Мұнан бөлек, орталық көшелердегі көргенде көз сүйсінетін әсем гүлдер мен газон да – мекеме қызметкерлерінің еңбегі.
Ерлі-зайыпты Абай Биболұлы мен Шакаризада Куленова осы мекемеде иық теңестіре еңбек етіп жүр. Олардың мұнда жұмыс істеп жүргендеріне бір жылдан асыпты. Отағасы Абай Биболұлы – автобус жүргізушісі. Ал Шакаризада гүл егеді, ағаштарды күтіп-баптайды, ал қыс уақытында қала тазалығына атсалысады.
– Осы күні тал әктеп жүрміз. Қала тазалығына, шаһардың әсем болуына үлес қосудың өзі бір бақыт қой. Қаланың үлкен көшелерінде өтіп бара жатып өзіміз еккен гүл мен газонның, жайқалған ағаштың әдемі болып тұрғанына қарап, маңдай теріңнің жемісі екенін сезінесің. Әрине, көктемгершілік науқанның уақытында жұмыс қызады. Сағатпен санаспай тер төгесің. Ал айлық жалақымыз уақытылы беріліп, ішер асымызға дейін мекеме қамтамасыз етіп отыр. Алдағы уақытта да қаламыздың әдемі болуы үшін еңбектене береміз, – дейді Шакаризада Куленова.
Қала іргесіндегі бірнеше елді мекеннен жұмысшыларды тасымалдауға автобустар бөлінген. Мұның өзі қызметкерлерге жасалған жағдайдың көрінісі емес пе?! Үйіне қайтар көлікті уайымдамай, қаламыздың көркеюі жолында алаңсыз маңдай терін төгіп келеді. Мекеме директорының орынбасары Алтай Мұқановтың айтуынша, қызметкерлер бір жылда 9 мыңнан астам ағаш егеді екен.
– Негізі 200-дің шамасында адам жұмыс істейді. Ал маусымның қызған шағында 250-ден астам адам еңбек етеді. Ағаштың бірнеше түрін егеміз. Өңірдің табиғи ерекшелігіне қарай таңдалған өсімдіктер бар. Суару автоматтандырылған. Ағаштарды тамшылату әдісімен суарамыз. Еккен газонымызды көрдіңіз бе, жап-жасыл болып, қаланың көркі мен ажарын келтіруде. Ал мұнан бөлек, ағаштарымыздың да жайқалып тұрғанын байқаған боларсыздар. Ектік, болды демей, оларды жыл сайын күтіп-баптап отырамыз, – дейді Алтай Нұрланұлы.
Бүгінде Қызылордаға кіреберістен бастап шыға беріске дейінгі аралықта ғаламат гүлзар бақтар пайда болған. Ағаштары да менмұндалап, саялы кейіпке еніп келеді. Аталған мекеме басшылары алда да талай жоспар барын алға тартады. Естеріңізге сала кетейік, аталған мекеме өткен жылдан бастап бес жыл қаланы гүлдендіруге атсалыспақ.
Дәулет ҚЫРДАН