Сырдариялық диқандар су үнемдеу мақсатында егін егудің заманауи үлгісіне көшуде. Бұл – өз кезегінде егін көлемінің артуына, жерді тиімді пайдалануға сеп.

 – Президенттің Сыр еліне жасаған жұмыс сапарында суды көп қажет ететін дақылдар көлемін оңтайландырып, су үнемдеу тапсырмасы бойынша егістік жерлерді лазерлік тегістеу жұмыстары жүргізілуде. Сол арқылы 30 пайызға дейін су үнемделіп, егін шығымы молаяды. Өткен жылы аудандағы шаруашылық құрылымдар заманауи лазерлік жер тегістегіш техникасымен 3500 гектар жерді тегістеді. Нәтижесінде, ауданда тегістеу жұмыстары 70 пайызға жетті, – деді аудан әкімі Берік Сәрменбаев.

Шаруашылықтар жаңбырлатып суару әдісімен 150 гектар жерге әртүрлі дақылдар орналастырып, нәтижелі өнім алған. Су тапшылығына байланысты суды аз қажет ететін дақыл егу және ауыл шаруашылығы саласын әртараптандыру бағытында  ауданда «Қызылорда крахмал-сірне зауыты» серіктестігінің «Жүгері дақылын терең өңдеу зауытын салу» жұмыстары жүргізілуде. Осыған орай, аудандағы шаруашылық құрылымдарымен 2000 гектарға жүгері егуге келісімдер жасалуда.

Нәтижесінде, су тапшылығына байланысты жүгеріні егіп, күзде өнімін аудандағы зауытқа тиімді бағамен өткізеді және жұмыс орындары сақталады.

– Мемлекет басшысының тапсырмасымен әлеуметтік маңызы бар азық-түлік қауіпсіздігін қамтамасыз ету, баға тұрақтылығын сақтау мақсатында ауданда 805 гектар жерге бақша, көкөніс дақылдары егілді. Оның ішінде, Айдарлы, Жетікөл, Аманкелді, Шіркейлі, Бесарық, Асқар Тоқмағамбетов ауылдарында жастар бригадалары 100 гектарға жуық жерге бақша дақылдарын орналастырып, мол өнім алды, – деді Берік Әбдіғаппарұлы.

 «QYRDAN»-ақпарат