Халықтың мұң-мұқтажын тыңдап, мәселесіне ден қою – әкімдердің мойнындағы жүк. Елдік мәселеде халықтың әл-ауқатының жақсарып, әлеуметтік жағдайының көтерілуі бағытында еңбек етуді олар парыз санайды. Сырдария ауданының әкімі Берік Сәрменбаев ауыл халқының алдындағы есепті кездесуін бұл жолы Бесарық, Қоғалыкөл және Шіркейлі ауылдарында жалғады.
Аудандық мәслихат депутаттары, дербес бөлім мен коммуналдық сала басшылары қатысқан жиын алдымен берекелі Бесарық ауылында өтті. Өнер мен мәдениетте, кәсіпкерлікте көш бастаған елді мекен халқының мәселесін тыңдады. Сауалдарына жауап берді.
– 2022 жылдан бастап Мемлекет басшысы Қасым-Жомарт Кемелұлы Тоқаевтың тапсырмасымен, Үкіметтің және аймақ басшысы Нұрлыбек Нәлібаевтың қолдауымен аймағымызда халыққа қажетті 200-ге жуық әлеуметтік нысан салынып, тұрғындардың игілігіне берілді. 1 600 шақырым автомобиль жолы мен 30 көпір өткелін салуға, күрделі жөндеуден өткізуге 144 млрд 775 млн теңге бөлінді. Биыл облыста жақсы жағдайдағы жолдардың үлесі 95 пайызға жетті. Қызылорда қаласында 270 көше қайта жаңғыртылды. Қызылорда-Жезқазған жолының бізге тиесілі 191 шақырымы бүгінде толық асфальттанды, енді жол белгілері мен инфрақұрылымы реттелу үстінде. Келер жылы толығымен пайдалануға берілмек. Дәл осы бағыттағы іргелі істер біздің ауданға да жат емес. Елді мекендердің жай-күйіне көңіл толады, – деді Берік Әбдіғаппарұлы.
Биыл Бесарық ауылында кіреберіс 2 шақырым жол түнгі жарықпен қамтылды.
Мұнан кейінгі сапар Қоғалыкөл ауылына жалғасты. Үш елді мекеннің үстінен жүріп өтетін Қызылорда-Аэропорт-Қоғалыкөл-Шіркейлі бағытындағы 10,2 км тас жолына «Қызылорда жолдары» ЖШС мердігерлігімен орташа жөндеу жүргізілген. Бүгінде халық тақтайдай тегіс жолдың үстімен сырғып жүр. Ал елді мекеннің ортасында орналасқан Қоғалыкөл көлінің үстіндегі бөгетке жүргіншілердің қауіпсіздігі мен ауылдың абаттануына сеп болып, түнгі жарық шамдар қойылды. Сонымен қатар, О.Садықұлы көшесінің бойына спорттық ойын алаңы салынып, пайдалануға берілді. Құны 7 млн 280 мың теңгені құрайтын бұл нысан бүгінде ауыл халқына жақсы болып тұр. Ауыл балалары мұнда бой сергітіп, спортпен шұғылдануда. Сондай-ақ, ауылға аяқ су әкелетін 2 шақырым канал жаңадан қазылып, ауыл толық аяқсумен қамтамасыз етілді.
Құлболды ишан кесенесінің алды демеушілік есебінен толықтай асфальталды және электр бағаналарымен электр желісі орнатылды. С.Майханова көшесі бойындағы ойын алаңының төсеніші (газон) жаңадан ауыстырылуда. Елді мекенді газдандыру бойынша да жұмыс қарқынды жүруде. Демеушілік есебінен 1 135,280 млн теңгеге жобалық сметалық құжаты әзірленді. Қоғалыкөл ауылдық клуб үйінің күрделі жөндеу жұмысына жобалық сметалық құжаты дайындалып, қаржыландыруға ұсынылды. Тағы бір айта кетерлігі, биыл елді мекенде Ә.Тілеулиев, М.Шоқай, С.Майқанова, Ы.Алтынсарин көшелері күрделі жөндеуден өтті.
Көше бойынан тыс орналасқан үйлердің жолына да балас төсеу жұмыстары қолға алынған. Бұл мақсатта жоба-сметалық құжаттарын дайындауға 25 млн теңге қаралды.
– Биыл барлық елді мекендер 100 пайыз орталықтандырылған сапалы ауыз сумен қамтамасыз етілді. 2021 жылдың соңында газдандыру деңгейі 67 пайызды құраса, бүгінде бұл көрсеткіш өңірде 83 пайызға жетті. Биыл газдандыру жобаларына 6 млрд 100 млн теңге қаржы бөлінген. 2022-2024 жылдары тұрғын үй кезегінде тұрған азаматтарға 5 мыңнан аса пәтер табысталды. Биыл 3 600 пәтерлі тұрғын үй салуға бюджеттен 58 млрд 785 млн теңге бөлінді. Айтулы инвестжоба санатында «Акса Энерджи» түрік инвесторымен 215 млрд теңгеге қуаттылығы 240 мегаватты құрайтын жаңа жылу электр орталығы салынды. Қызылорданы ыстық сумен қамтамасыз ету мәселесі оң шешімін тапты. Жыл соңына дейін облыс орталығындағы көпқабатты үйлер ыстық сумен қамтамасыз етіледі. Бұл – аймақ дамуының айқын көрінісі, – деді Берік Әбдіғаппарұлы.
Аудан әкімі сапарлаған үшінші елді мекен – Шіркейлі ауылы. Шіркейлі – таяуда ғана республикалық деңгейде өткен «Мерейлі отбасы – 2025» ұлттық байқауында топ жарып, аймақтың абыройын асқақтатқан Әбсадықовтар отбасының ауылы. Қоғамның көп саласында көш бастап жүрген елді мекенде Ж.Нұрсейітов, Б.Жақыпов көшелері күрделі жөнделіп, шағын футбол алаңы пайдалануға берілді. Мұнан өзге де ауыз толтырып айтарлық игі істер жетерлік.
Аудан басшысы аталған елді мекен тұрғындарының ұсыныс-пікірлерін тыңдап, тұрғындарға жеке мәселелері бойынша қабылдау жүргізді. Тиісті сала басшыларына тапсырмалар берді.
«QYRDAN — ақпарат»