Сәні мен салтанаты келіскен қоғалыкөлдіктер отасқандарына елу жыл толған үш жұпқа құрмет көрсетті. Отбасылық құндылықтың төрінен орын тауып, кейінгіге үлгі-өнегесі толайым болған олар алдымен Сырдария аудандық неке сарайында бас қосты. Мұнда орталық басшысы Салтанат Бекжүнісова той иелеріне салтанатты түрде «Алтын той» куәлігін тапсырды.
Жиында Сырдария аудандық әйелдер кеңесінің төрайымы Жанна Есентұрқызы құттықтау сөз алып, аудандық ардагерлер және әйелдер кеңесінің атынан арнаулы Алғыс хат тапсырды.
Қоғалыкөлдік Нұрлыбек Ахетов пен Дәмен Дауылбайқызы, Думан Хамзаев пен жұбайы Рыскүл Шайхиева, Жаңабай Шәріпбаев пен жары Жұмакүл Әлдекешова – осынау салтанатты кештің төрінде кейінгі толқынға өсиетін айтып, тағылымды әңгімелер айтты.
Алтын тойға Сырдария ауданының құрметті азаматы, Қызылорда облыстық әжелер алқасының төрайымы Разия Қалжанова және туған жерінің әрбір жақсылығына өз үлесін аямайтын кәсіпкер Кенжебек Кішкенбаевтар қадірменді қонақ ретінде қатысты. Салтанатты кештің шымылдығын ашқан Разия Қалжанова отбасы құндылықтарының маңызын атап өтіп, алтын той иелеріне ұзақ ғұмыр, ұрпақ қызығын көруге тілегін білдірді.
Сырдария ауданының орталығы Тереңөзек кентінен туған жерге беттеген қуанышты керуеннің алдында тосын сый – Қоғалыкөл ауылдық мәдениет үйінде салтанатты кеш дайындалып жатты. Мұнда ауыл өнерпаздары әуелетіп ән салып, мың бұрала билейді. Ал сахналық қойылым мен безендірулер ата салтынан ажырамаған қазақтың дәстүрі мен салтын танытып тұрғандай. «Ұлағат болсын ұлыңа, ғират болсын қызыңа» атты мерекелік кешке халық тайлы-тұяғымен келген. Ине шаншар орын жоқ. Бұл жиынды ауылдық мәдениет үйі мен ауылдық әйелдер кеңесі бірлесе ұйымдастырған болатын.
– Бұл іс-шараның кейінгі ұрпақты тәрбиелі болуға, отбасылық құндылықты сезінуге, бірлігі бекем, тірлігі түзу отбасын қалыптастыруға үндеуде маңызы жоғары. Ата-салтымыз бен дәстүрімізден асқан терең ойлы пәлсапа жоқ. Алдыңғы толқынның үлгісін кейінгі ұрпаққа жеткізуде осындай іс-шараның маңызы жоғары. Кәдімгі ұлан-асыр той болды. Халықтың қуанышы, қызығушылығы өте жоғары деңгейде. Ұйымшылдықпен жақсы өткіздік. Ауылдағы «Жамбыл-2030» ЖШС төрағасы Болат Рүстемовке осындай іс-шараға демеушілік танытқаны үшін алғыс айтамын, – дейді ауылдық әйелдер кеңесінің төрайымы Рахима Досжанова.
Бұл кісілер жарты ғасыр қол ұстаса жүріп, қоғамның түрлі саласында еңбек етті. Ауыл шаруашылығын көтеруге білек сыбана атсалысты. Бірі механизатор, енді бірі күрішші, тағы бірі еңбек майданының басқа салаларында тер төкті. Қайсыбір сәтте де апаларымыз ерлерінің қасынан бір елі қалмай, бірге еңбек етті. Иық теңестіре жүріп, осы күнге жетті. Бүгінде осы Алтын той иелерінің қатарында ел ағалары Байбөрі, Бисенбай ақсақалдар да тұрар еді… Ел игілігі жолында таң азаннан қара кешке дейін талмай еңбек еткен азаматтардың бірі болатын. Бұл күнде шаңырақтың отын сөндірмей, ұрпағының ортасында бақытты ғұмыр кешіп, кейінге өнегесін айтып отырған ел аналары Айымкүл, Шырын апалар төрге шығып, елдің кешегісі мен бүгіні туралы сөз етті.
Кеш барысында өмірдің талай белесін бірге өткеріп, еңбек майданында да, отбасы шаңырағында да өзара сыйластық пен сабырлы мінездің үлгісін танытқан жандар осылай құрмет төріне шығарылды. Слайд арқылы естелік фотолар көрсетілді. Арнаулар айтылып, ән мен биге көмкерілген Қоғалыкөлдің аспаны жарқырай түсті.
– Бұл кеш ауыл тұрғындары үшін ерекше әсерлі, жүрекке жылы, отбасылық құндылықты дәріптеген мағыналы мереке болды. Осы кештің өткізілуіне мұрындық болған ауылдық әйелдер кеңесінің төрайымы Рахима Алдашқызына алғысымызды білдіреміз. Алтын той иелеріне мықты денсаулық, амандық, ұрпақ қызығына бөлене берулерін тілейміз, – дейді Қоғалыкөл ауылдық клубы басшысының міндетін атқарушы Райхан Шүкірәлиева.
«Отан – отбасынан басталады» дейді қазақы тәмсіл. Қазақы қалпымызды жоғалтпай, ата-бабадан мирас боп қалған құндылықты дәріптеу отбасынан басталады. Демек, елу жылды еңсеріп, жарты ғасыр жарасқан жұптардың өмірі әр қазаққа үлгі болары анық.
Дәулет ҚЫРДАН