Алақандай ауылдың клуб үйінде орналасқан кітапхананың аядай бөлмесінде қалың ойға шомып отыр екен. Ә дегенде ойланып отыр деп қаларсыз, бірақ қолындағы кітапты оқып, сол әлемге еніп кеткен тәрізді. Бердібек Соқпақбаевтың «Балалық шаққа саяхаты». Иә, бала күнімізде жата-жастана оқитын осы кітапты әлі күнге қолынан тастамайтын жандар бар. Кейде өзіміз де бала күнге аңсарымыз ауғанда сол кітапты парақтап отырамыз.
– Сәлеметсіз бе? – дедім есікті қағып.
Кішіпейіл қалпымен сәлемімді қабыл алып, төрлетіңіз дегендей жоғарғы жақты нұсқады. Қоғалыкөлдегі кітапхананың кітапханашысы Нұргүл Жұматаеваның жұмыс орнына осылай бардық. Әңгіме арасында кітап туралы пікірлескенде мен оның жан бойындағы кітапқа деген құмарлық пен оқу-білімге деген ерекше құлшынысты аңғардым.
– Менің сүйікті кітабым «Балалық шаққа саяхат» деп ойлап қалған боларсыз. Бүгін менің қолыма кездейсоқ түсті. Қолыма кітап түссе, парақтай қалатын әдетім бар. Мен Шерхан Мұртазаның «Ай мен Айшасын» жақсы көремін. «Ай мен Айша» – ана тақырыбына арналған қазақ әдебиетіндегі шоқтығы биік шығармалардың бірі. Биыл «Ай мен Айша» романы бойынша оқырмандар конференциясы өткізілді, – деді ол.
Ауылдық кітапханада 26 117 кітап бар. Бүгінде келушілер саны 10 мыңнан асты. Тұрақты оқырмандар мыңға жуықтады. Осы руханият ордасында маңдай терін төгіп жүрген білікті маман саладағы он жылдан астам уақытта көптеген жетістікке жетіп үлгерді. Ол 2019 жылы «Өлке болып оқимыз» жобасы бойынша алғыс хатпен, «Тарихи тұлғаларды танытқан үздік библиографиялық құрал» номинациясымен, аудандық «Үздік ауыл кітапханасы» байқауы бойынша «Көркем үйлесімді кітапхана» номинациясымен марапатталды. Ал 2020 жылы Қоғалыкөл ауылдық модульдік кітапханасының алдыға қойған міндеттері мен мақсаттарын мүлтіксіз іске асыруы бойынша алғыс хатпен, 2021 жылы «Өлке болып оқимыз» жобасында жан-жақты білімі мен кәсіби шеберлігі бойынша алғыс хатпен, «Жыл кітабын бірге оқимыз» атты облыстық онлайн-байқауы бойынша алғыс хатпен, «Күлтегін – жырдың сардары» атты ауыл кітапханашылары арасында өткен көркемсөз байқауы бойынша алғыс хатпен марапатталды.
Білікті маман ел тәуелсіздігінің 30 жылдығы мемлекеттік мерекесіне байланысты алғыс хатпен, Мәдениет және өнер қызметкерлерінің күніне байланысты алғыс хатпен марапатталып, ІІ Қазақстан Республикасының «Jana Kitaphana-2022» үздік кітапхана онлайн байқауына қатысқаны үшін сертификат иеленді.
Сонымен қатар, ІІ Қазақстан Республикасының «Jana Kitaphana-2022» үздік кітапхана онлайн байқауында «Біздің кітапханаға қош келдіңіз» номинациясы «Ауылдық кітапханасы» санаты бойынша Гран-При жүлдесін жеңіп алды. «Кітапханашылар күні» мерекесіне орай облыс бойынша бірнеше жыл қатарынан алғыс хатпен марапатталды. «Мәдениет жанашыры» атты төсбелгісінің иегері. Нұргүл Жұматаева 2025 жылы адам жанына аса зор рухани азық беретін кітапхана саласының жаңа қоғамда қалыптасуына атсалысқаны үшін алғыс хатқа қол жеткізді.
– Кітапханашы – бұл білім мен мәдениеттің маңызды бөлігі болып саналатын тұлға. Олар тек кітаптарды жүйе бойынша реттеп, оларды сақтау қызметімен шектелмейді. Бұл мамандықтың терең тарихы мен ерекшеліктері бар, ал олардың міндеттері заман ағымына сай өзгеріп, күнтізбелік шаралар және ақын-жазушылардың мерейтойларына шаралар ұйымдастырылып отырады. Міне, осындай міндетті мүлтіксіз орындай жүріп, кітапханаға келген жаңа әдебиеттерді «Рабис» бағдарламасына тіркеп, көрме жасап, келген оқырмандарға жаңа әдебиеттерді таныстырып өтемін. Әлбетте, айтуға оңай. Бірақ өз мамандығыңды жақсы көрсең, мұндай ұзынсонар тізімнің барлығы жай жұмыс болып қалады, – дейді кітапханашы.
Адам баласының ешкім тартып алмайтын байлығы бар. Ол – білімі мен қабілеті. Өскелең ұрпақты кітап оқуға тартып, күн сайын жаңа әдіс-тәсілдерді меңгере жүрген ізденімпаз маман кітап оқудың пайдасымен бізбен де бөлісті.
– Кітап оқу – адам баласының есте сақтау қабілетін, жадын жақсартады. Негізі сол ұмытшақтықпен ауыратын адамдардың көпшілігіне осы дағды жақсы көмектеседі. Әрі кітап оқыған адам той-жиындарда сөйлегенде, екеуара әңгіме арасында жақсы сөйлеп, сөздік қорының мол екенін көрсетеді. Кітап оқу арқылы адамның ой-өрісі дамиды. Міне, кітап оқудан алыстағандардың тіпті өз ойын дұрыс жеткізе алмайтынын көріп, қатты ойланасың. Қазір кітап оқимын деген адамға уақыт тапшы деп айту қиын. Түнгі кітапхана да ашылып, жұртшылыққа жағдай жасалып жатыр, – дейді ол әңгіме арасында.
Көкірек көзі ояу адамның қайсыбір сәтте де өзгелерден көші ілгері болып тұратыны анық. Нұргүлдің сөз саптасы мен ойын жеткізуіне қарап, тәнті болдық.
Аян СПАНДИЯР