Қай мамандыққа сұраныс жоғары? Колледж бітірген жас еңбек нарығында өзін қалай таба алады? Теориялық білім мен нақты өндірістік дағдының ара-жігін қалай жақындатуға болады? Қызылорда облысы Шиелі ауданында студенттермен өткен кездесуде осы мәселелер ашық талқыланды.
Шиелі индустриалды — аграрлық колледжінде өткен «Өндірістік мамандықтар – ел экономикасының тамыры» атты кездесуге «Әділет» партиясы Шиелі аудандық филиалының төрағасы Жібек Баймұратова, колледждің оқу-тәрбие жұмысы жөніндегі орынбасары Бақтияр Дайрақұлов, оқытушылар мен студенттер қатысты.
Кездесудің негізгі өзегі – жастарға мамандық таңдаудың тек диплом алумен шектелмейтінін түсіндіру. Қазіргі еңбек нарығында жұмыс берушіге теорияны білетін ғана емес, алған білімін іс жүзінде қолдана алатын, технологиямен жұмыс істейтін және кәсіби біліктілігін үнемі жетілдіретін мамандар қажет.
Өндіріс, ауыл шаруашылығы, құрылыс, энергетика, көлік және техникалық салалардың дамуы тікелей кәсіби кадрларға байланысты. Сондықтан колледждердегі білім беру процесін еңбек нарығының нақты сұранысымен ұштастыру мәселесі өзекті болып отыр. Қазақстанның техникалық және кәсіптік білім беруді дамыту тұжырымдамасында да мамандарды даярлауды еңбек нарығының болжамды қажеттіліктеріне сәйкестендіру және жастар арасында кәсіптік бағдар беру жұмыстарын күшейту көзделген.
«Әділет» партиясы бұл бағытты өзінің сайлауалды бағдарламасындағы экономикалық және әлеуметтік міндеттермен байланыстырады. Партия бағдарламасында алдағы бес жылда 1 миллион жаңа сапалы жұмыс орнын құру мақсаты белгіленген. Мұндай міндеттің орындалуы еңбек нарығына қажетті мамандарды даярлау, жастардың кәсіби әлеуетін арттыру және өндірістік кадрлардың сапасына тікелей байланысты.
Кездесуде осы мәселеге тоқталған «Әділет» партиясы Шиелі аудандық филиалының төрағасы Жібек Баймұратова жастардың мамандық таңдауда еңбек нарығының талабына назар аударуы маңызды екенін айтты.
«Бүгінгі таңда мамандық таңдағанда оның атауына немесе қоғамдағы беделіне ғана емес, нақты сұранысына қарау қажет. Еңбекпен шыңдалған, өз ісін жақсы меңгерген маман кез келген ортада қажет. Сондықтан колледж қабырғасында алған білімді тәжірибемен ұштастырып, кәсіби шеберлікті ерте бастан қалыптастыру маңызды. Ел экономикасының дамуы білікті маманға тікелей байланысты», – деді Жібек Баймұратова.
Оның айтуынша, өндірістік мамандықтарды таңдаған жастар үшін басты артықшылықтардың бірі – алған кәсібін нақты еңбекпен ұштастыру мүмкіндігі. Бүгінде техникалық және кәсіптік білім беру жүйесінде еңбек нарығына қажетті мамандарды даярлауға, кәсіптік бағдарға және өндірістік тәжірибеге басымдық беріліп отыр.
Колледждің оқу-тәрбие жұмысы жөніндегі орынбасары Бақтияр Дайрақұлов та студенттердің кәсіби қалыптасуында тәжірибелік білімнің маңызына тоқталды. Оның сөзінше, білім алушылардың теориялық білімін өндірістік дағдылармен ұштастыруы – болашақ маманның еңбек нарығына бейімделуінің маңызды шарты.
Кездесуде студенттер өндірістік мамандықтардың ерекшеліктері, жұмыс берушілер талап ететін дағдылар, кәсіби біліктілікті арттыру және еңбек нарығындағы өзгерістер туралы сұрақтарына жауап алды.
Бір мамандық – бір адамның ғана кәсібі емес. Ол тұтас өндірістің, кәсіпорынның және экономиканың жұмысына әсер ететін фактор. Сондықтан бүгін колледж қабырғасында кәсіби таңдау жасаған жас – ертең өңірдің өндірісіне қажетті кадр болуы мүмкін.
«Әділет» партиясының бастамаларында да еңбек адамының мәртебесін арттыру, сапалы жұмыс орындарын көбейту және экономикаға қажетті кадрлық әлеуетті қалыптастыру мәселелері өзара сабақтас қарастырылады.
Партияның сайлауалды бағдарламасында көзделген 1 миллион сапалы жұмыс орны туралы мақсат та осы мәселелердің маңызын көрсетеді.
Ал Шиелі индустриалды — аграрлық колледжіндегі кездесу жастарға бір қарапайым ойды жеткізді: еңбек нарығында қажет маман болу үшін дипломның өзі жеткіліксіз. Білім, нақты дағды және өз кәсібіне деген жауапкершілік қажет.
